Cu satisfaccion MANA a celebra un otro logro duradero pa comunidad di Aruba y su bishitantenan. Riba
18 di mei ultimo, Dia Internacional di Museo, Minister encarga cu Finansa y Cultura Xiomara Maduro a
lansa MANA su website nobo, cu e nomber National Archaeological Museum Aruba. MANA tin oido pa
su bishitantenan y a crea e website aki pa por cumpli cu necesidad di publico pa haya informacion
actual. Den nos era digital, a lansa e website pa conecta MANA cu comunidad di Aruba y
internacionalmente.
Durante celebracion di Dia Internacional di Museo, a lansa e website na un manera festivo, como parti di
un programa pa publico enfoca riba e tema di 2024 pa e dia internacional concerni: Investigacion y
Educacion. Dos tema cu ta cuadra cu tareanan principal di MANA relaciona cu salvaguardia nos herencia
cultural arkeologico.
Mondriaan Cultuur Fonds y UNOCA a sostene financieramente e desaroyo y diseño di e website aki cu a
ser lidera door di e profesional Rudy Croes cu sosten di e ekipo di compania Cr38te. Rebecca Roos
Production a percura pa bunita potret di calidad halto y boluntario Hannah Lee a contribui cu hopi
energia pa haci e website miho. Coleganan di MANA a percura pa contenido di e website y a siña con pa
sigui manten’e.
Cu e website aki MANA ta duna mas y miho servicio na su usuarionan. Ademas di por haya informacion
di MANA, por mira kiko nobo e Museo tin riba su programa y kiko lo por cumpra na MANA. E website ta
accesibel tambe pa personanan cu limitacion visual pa medio di un funccion auditivo. Di e forma aki
MANA ta sostene inclusividad di un grupo cu necesidad specifico. Publico lo keda bon informa di
noticianan y haya sa mas di exposicionnan y artistanan y lo sigui agrega informacion.
Actualmente tin publicacionnan di Museo na benta. Meta ta pa den futuro establece un tienda di regalo
y cafetaria y duna informacion di nan via e medio social aki. Facilmente por pidi informacion tocante
posibilidad pa haya guia pa grupo y opcionnan pa huur espacio via info@manaruba.org. Tambe por hasi
pregunta y duna sugerencia.
E lansamento di e website ta un paso mas den inovacion y digitalisacion di MANA. Reconociendo cada
organisacion y persona cu a sostene e proyecto concerni, MANA ta invita un y tur pa tira un bista riba
nos website via e www.manaruba.org y recomend’e na otronan.
