Den declarcion duna recientemente, mr. Gerlien Croes candidato number 4 riba lista di partido AVP, a mustra cu e ta spera cu den futuro cercano lo por yega na e punto cu ta introduci un sistema cu por ehempel na Europa ta hopi conoci, esta un sistema di cualificacion na unda por midi e nivel di e persona su desaroyo y reconoce esaki pa asina por habri caminda pa e persona aki den nos sociedad.
Na Aruba tin hopi persona cu a hasi diferente tipo di cursonan pero cu no tin diploma di un opleiding, mayoria di biaha e personanan aki a gana hopi experiencia cu nan añanan di trabou pero na momento cu nan perde trabow ta bira dificil pa nan bolbe drenta mercado laboral paso awendia mayoria dunado di trabou ta exigi un diploma.
C’un sistema di ‘qualification’ por qualifica e persona a base di su experiencia y nivel di conocemento y asina reconoce esakinan pa por crea oportunidad nan pa bolbe back na pia di trabou.
“Mi ta para tambe pa muchanan te cu 21 aña, cu nan mester tin un cualificacion, un asina yama ‘kwalificatie plicht’, den otro palabra cu na edad di 21 tur hende tin un diploma den man y asina tambe crea cu tur hende na Aruba tin un paspoort laboral pa nan por sigui desaroya nan mes y tin posibilidad pa haya un trabou.
Nos tin cu bay amplia nos conocemento, nos mester bay ta habri pa realisa cu si nos no crea un base firme, nos lo no por tin un desaroyo desea pa nos pais.
Cada centro di bario, cada districto, si no ta un centro di bario mes, e infrastructura cu nos tin, nos mester por sa di usa esakinan corectamente, efectivamente y introduci programa pa despues di scol, y weekend pa mucha-, hoben- y adultonan y hasta nos hendenan grandi.
Si nos kier papia di educacion pa bida largo, nos mester por crea y reconoce e oportunidadnan aki tambe pa bida largo pa tur grupo, sin ningun distincion.
Definitivamenta awor ta e momento pa expansion di e oportunidadnan aki y mas cu tur cos, dialogo y comunicacion ta hunga un rol hopi importante pa nos yega na esaki.
Docentenan tin nan retonan caba locual ta enseñansa formal y laga nos wak con nos por presenta un miho forma pa duna asistencia na e formacion di muchanan y hoben nan , cu tambe lo resulta den un actividad preventivo pa locual ta nos retonan social cu Aruba conoce.
Laga nos desaroya, laga nos forma e miho personanan cu por duna bek den nos comunidad,” mr. Gerlien Croes di AVP a declara.
