Mocion di desconfianza contra minister Glenbert Croes
Awe nos tur ta testigo di un situacion esquizofrenico: un minister cu kier duna un discurso academico pakico e no a traha cu un base legal. Na mes momento minister ta rabia, ta grita, su man ta tembla y su cara ta bira cora. Un situacion esquizofrenico pasobra na mes momento minister kier pa bo haya lagrima den bo wowo, bo haya compasion cu minister y bo haya simpatia pa e gran genio di e minister cu a inventa FASE cu no tabatin ningun caminda na mundo. Lamentablemente e gran genio cu a inventa FASE na ningun momento por a corda cu e mester base legal pa uza placa di Pueblo.
P’esey no kiboka; e Ley aki no ta pa yuda un grupo vulnerabel den nos comunidad. E ley aki ta pa legalisa pagonan ilegal.
Mescos cu gobierno no ta worry con e ta sigui, sigui y sigui aumenta goederen en diensten, gobierno no a worry con el a anda cu placa di Pueblo den cuadro di FASE. Esaki ta demonstra un biaha mas cu Gabinete Wever-Croes ta sigur di e apoyo di su parlamentarionan pa cu eigen bijdrage pa cu cuido medico, pa aumento di accijns, BAVP, 12.5% di sector publico y semi-publico, BTW di 14%, aumento di awa di 60% den e prome bracket, LNT di 130% cu lo trickle down.
Den cuadro di ayudo di FASE gobierno a probecha di un crisis pa politisa ayudo. Raad van Advies, ARA y CAD ta mustra con preucupante e manera cu gobierno a anda cu FASE ta: Centrale Accountantsdienst ta mustra con gobierno a crea peliger di favoritismo politico, mal uzo di fondonan publico, fraude y corupcion cu e manera con gobierno a trata cu FASE. Segun Algemene Rekenkamer gobierno no a percura pa claridad riba procedura encuanto con mester a otorga ayudo di FASE. Tambe Algemene Rekenkamer ta mustra cu tampoco tabatin claridad riba e exigencianan pa bin na remarca pa e ayudo aki, habriendo porta hancho habri pa: ‘ad hoc handelen’. Gobierno kier sconde tras di e crisis di Covid pa bisa cu iregularidadnan aki ta un caso isola debi na un situacion hopi particular. Sin embargo Raad van Advies ta subraya cu ta custumber di gobierno pa actua sin base legal pa despues legalisa esaki.
P’esey tin mas cu sificiente motibo pa entrega e siguiente mocion cu ta conta cu e apoyo di fraccionnan di AVP, MAS y Accion 21:
