E autor Samuel Beckett a skirbi un obra teatral absurdo na Frances, titula “En attendant Godot” (1952)
cu a ser traduci na Ingles bao e titulo “Waiting for Godot’ (1954). E storia a bira un di e obranan teatral
mas influyente desde Segunda Guera Mundial. E obra ta mustra dos choller, Didi y Gogo. Nan ta topa
otro na un caminda di tera bao di un palo. Nan a bin pa un encuentro cu Godot. Mientras nan ta warda
Godot yega, Gogo ta conta Didi con e anochi prome un grupo di hende a bati e y lag’e tira den un rooi.
Gogo ta keha cu su sapatonan no ta pas y Didi ta keha cu su pianan ta stijf pa motibo di un problema cu
su blaas. Asina nan ta combersa y discuti mientras nan ta warda Godot yega. Tempo ta pasa, nan ta
cansa, nan ta irita y nan hasta ta desespera. Pero Godot nunca ta yega… Dado momento un mucha ta
acerca Didi y Gogo y ta bisa nan cu Godot no lo bin awe, pero mayan. Didi y Gogo ta dicidi pa bolbe pa su
mayan pa warda riba e encuentro cu Godot. Dianan ta pasa, pero Godot nunca ta yega… E obra ki a
inspira e autor politico Savastano pa haci e siguiente observacion: “Waiting for an incompetent
government to fix things is much like Waiting for Godot.”
E manera cu Gobierno Wever-Croes ta actua y especialmente su prome minister tin tur carateristica di
un Gobierno incompetente: e no ta logra traha un presupuesto na tempo, e no ta cumpli cu su
obligacionnan constitucional y e no ta transparente. Tampoco e ta logra cumpli cu su compromisonan cu
Hulanda. P’esey, aparentemente, Hulanda a cansa di e gañamento patologico di Gabinete Wever-Croes.
Hulanda a mira con Gobierno a priminti desde 2018 di baha gasto di personal usando un plan di maneho
(Beleidsplan Verlaging Personeelslasten), pero ora di cumpli CAft a raporta bes tras bes cu Gobierno a
druip y pa colmo a keda nenga di duna transparencia. Hulanda a mira con Gabinete Wever-Croes a
cambia di idea na caminda, a haya mas facil pa bin cu un reduccion structural di 12,6% den salario di tur
ambtenaar y a uza e pandemia pa bende e reduccion aki dos biaha na dos diferente forma: un pa
Hulanda (reduccion di gasto) y un pa Aruba (solidaridad ‘boluntario’). Awo Hulanda ta pensa: “Fool me
once, shame on you. Fool me twice, shame on me.” Hulanda no ta confia Gobierno Wever-Croes mas ni
su promesa cu lo colabora cu e Consensus-Rijkswet Aruba financieel toezicht (RAft). P’esey Hulanda ta
exigi un garantia den forma di un overgangsprotocol sin einddatum. Cu otro palabra, tanten cu no tin
Rijkswet, e protocol lo ta na vigor.
Mientras tanto Aruba tin un problema di likides: paga pa salario di ambtenaar, paga pa office supplies
etc. Hulanda ta willing pa duna ayudo bao condicion cu Gobierno ta cumpli cu Landspakket y ta duna
garantia cu lo yuda haci RAft un realidad. E opcion logico ta pa duna Hulanda un garantia cu Gobierno di
berdad lo colabora cu RAft. Pero e opcion logico aki lo desenmascara e hecho cu señora Evelyn a entrega
henter e autonomia di Aruba aña pasa. E opcion logico lo revela cu na momento di firma e acuerdo cu
Hulanda riba dia 13 di november 2020 señora Evelyn a gaña cu e lo traha pa ‘un autonomia mas fuerte’.
El a bolbe gaña nos den su discurso di fin di aña cu ‘2021 lo ta un miho aña’ pa un ‘autonomia mas
fuerte’ (wak su mensahe di cambio di aña:
https://m.facebook.com/MinPresAruba/videos/185769739949688/) .
Señora Evelyn a ‘get away’ cu hopi engaño; e tin un habilidad increibel pa troce e realidad na su
bentaha, violando tur regla di logica. E documento mas halto den Reino, e Statuut voor het Koninkrijk
der Nederlanden, ta stipula cu asuntonan di Reino (articulonan 3 y 43) ta asuntonan cu solamente e
gobierno di Reino y e legislador di Reino tin mag di regla. Tur otro asunto hunto ta forma nos autonomia
(articulo 41 Statuut). Cu otro palabra, nos finanzas publico, nos economia y turismo, nos cuido medico,
enseñansa, asuntonan social y nos husticia tur ta un asunto interno di e Pais Aruba. Señora Evelyn nunca
ta splica Pueblo cu aña pasa el a entrega hustamente e asuntonan aki na Hulanda en cambio di ayudo
financiero. Hulanda a propone un ‘integrale aanpak’ pa cu cuater ‘themagebieden: I. Overheid en
financiën, II. Economische hervormingen, III. Zorg en onderwijs, IV. Versterken rechtsstaat.’ Cu otro
palabra e Landspakket ta cubri cada area cu segun Statuut ta un asunto interno. Si señora Evelyn a lesa e
acuerdo cu Hulanda cu e mes a firma dia 13 di november 2020, e lo tabata sa cu na aña 2021 Aruba lo
wordo presenta cu un plan Hulandes cu ta manca esencia di nos democracia y autonomia.
P’esey señora Evelyn no tin ni e autoridad moral ni base legal pa su acusacion cu Hulanda ta exigi un
overgangsprotocol cu lo bypass Parlamento di Aruba, forsando Gobierno pa actua ilegal y contra
constitucion. Amigonan, señora Evelyn a bypass parlamento y constitucion caba riba dia 13 di november
2020 y ta danki na Raad van State cu nos a resta un tiki di nos dignidad como Pueblo (URL:
https://www.raadvanstate.nl/@123232/w04-20-0408/). E acusacion grave cu Hulanda a cambia
exigencianan pa ayudo di likides na ultimo ora y asina di “moving the goalposts” no tin merito. Señora
Evelyn kier scapa cara poniendo bo kere cu Hulanda (1) ta cambia e criterio di un proceso, (2) durante cu
e proceso ta andando, (3) cu e meta pa crea un desbentaha pa Aruba. E tristo realidad ta cu señora
Evelyn (1) ta viola integridad, (2) door di gaña y (3) door di su falta di transparencia pa purba tapa e
berdad cu el a entrega autonomia caba y cu Aruba no tin nada di bisa mas!
