E siklo “Historia i Gobernashon na Kòrsou, organisá pa Akademia Popular Errol Scoop a finalisá djaluna último 30 di novèmber ku e último lès di e profeshonal ekonomista i hurista mr. drs. Caryl Monte. El a elaborá riba ròl di Banko Sentral di Kòrsou i St. Maarten loke ta enserá maneho monetario, promoshon i kòntròl di tráfiko di plaka, kresementu i stabilidat ekonómiko, kòntròl di bankonan komersial.
Ekonomista Caryl Monte a inisiá su lès splikando kursistanan kon e struktura di organisashon di nos banko sentral ta hinká den otro.
Dosente Monte a hasi uzo di e wil di responsabilidat pa mustra e kantidat di tareanan ku ta kai bou di Banko Sentral e.o. supervishon monetario, supervishon prudensial, supervishon di kondukta i integridat.
Mas aleu el a elaborá e 3 tiponan di maneho makro ekonómiko di un pais ku ta sumamente importante pasobra ta nan ta disidí tur loke ta sosodé den e esfera ekonómiko general di un país. Un ta e maneho ekonómiko ku ta kai bou di responsabilidat di minister di desaroyo ekonómiko i ta dirihí riba kresementu ekonómiko. E otro ta maneho presupuestario ku ta responsabilidat di minister di finansa ku ta responsabel pa manehá finansa di pais. E instrumento ku e tin na su disposishon ta presupuesto di Kòrsou. E di tres maneho gobièrnu a delegá na un instansia outónomo den pais esta Banko Sentral. Esaki ta enserá supervishon monetario pero tambe e supervishon finansiero. Banko sentral ta outónomo i ta hasi su trabou independientemente di e maneho presupuestario i maneho di desaroyo ekonómiko.
Mas aleu dosente Monte a splika ku e 3 tiponan di supervishon mas prinsipal ku banko sentral ta hasi ta supervishon monetario, supervishon finansiero òf supervishon prudensial i supervishon di integridat.
Supervishon monetario ku ta un di e pilarnan grandi di Banko sentral ta dirihí riba mantenshon di e balor interno i eksterno di e moneda. E balor interno pa kombatí inflashon pa e no pèrdè forsa di kompra. Eksterno tin di aber ku tipo di kambio.
Ophetivonan prinsipal di e tres tipo di supervishon ta pa promové konfiansa, stabilidat di e balor di e moneda i promové un sistema finansiero salú i un trafikashon di pago mas sigur i efisiente posibel.
Ora ta hasi supervishon monetario ta supervisá e parti monetario pero tambe e parti ekonómiko i financiero.
Bankonan komersial ta e institutonan primario ku Banko sentral ta supervisá. Nan tin ku raportá estriktamente. Pa monitoriá en general ta hasi uzo di rapòrtnan mensual di banko, informashon di diferente sektor ekonómiko i informashon di gobièrnu su presupuesto. Informashon di tur e institutonan bankario i di krédito huntu ta yuda pa hasi un análisis ekonómiko real di e ekonomia di pais. E ta duna un bon bista di e faktornan ku ta afektá reserva di divisa. Reserva di divisa ta un parti hopi importante di trabou di un banko sentral espesialmente den un pais manera nos kaminda florin ta mará na un moneda stranhero esta dòler.
Ta internashonalmente konosí ku un pais mester disponé di minimalmente 3 luna di reserva di divisa pa e mantené konfiansa den su moneda.
Supervishon finansiero òf supervishon prudensial ta un tarea hopi importante.
Ta monitoria e situashon òf finansiero di un instituto bou di supervishon. Esaki tin ku sosodé di luna pa luna. Mester keda wak kada un institushon bou di supervishon ku tin un lisensia ku nan a haña di Banko Sentral a base di e rapòrtnan mensual obligatorio i análisisnan interno pa sa si tin ku intervení. Tin diferente institushonnan ku ta kai bou di supervishon anto e institushonnnan aki ta di diferente kategoria.
Bankonan komersial, bankonan di spar i krédito, bankonan ku ta duna hipoteka pero tambe Institutonan di krédito ta kai bou di supervishon di banko sentral por medio di e lei di supervishon di institutonan di krédito i bankario.
Institutonan manera kompanianan di seguro, brokernan di seguro ta atendé ku plaka di seguro di hende. Pa e motibu ei nan ta kai bou di supervishon di Banko sentral. Institutonan manera bolsanan di balor, trustkantor, kantor di tranferensia ku tin di aber ku plaka tambe ta kai bou e mésun lei di supervishon.
Dos institushon ku tambe banko sentral ta supervisá ta SVB i Algemeen Pensioenfonds Curaçao komo ku penshun tambe ta un sorto di seguro.
Pa evaluá si e kompanianan ta salú i keda salú ta uza kriterionan partí den
kriterionan finansiero i no finansiero. Serka tur institushon Banko sentral ta wak p.e. kuantu kapital e institushon tin.
Supervishon di integridat
Esaki ta e parti kaminda ta skrin hendenan manera direktornan, komisarionan òf akshonistanan grandi ku ta guia institutonan finansiero riba integridat i ta monotoriá nan kondukta.
Promé ku un persona asumí un puesto den un instituto finansiero manera Banko ta hasi un inbestigashon hopi profundo di antesedente di e hende. Esaki ta un parti hopi importante ku ta sosodé den e mudu finansiero pa garantisá konfiansa den e instituto.
Banda di tur e tareanan ku ya a bini dilanti, Banko Sentral ta ehersé algun tarea ku públiko kasi no ta mira. Nan ta entre otro: vigilá sirkulashon di moneda, kordinashon di tráfiko di pago, kompilashon di datonan i estadístika di sektor finansiero lokal i tambe di afó, determiná tipo di kambio, aktua komo Banko central di divisa, kobra license fee (un belasting ku ta paga ora kambia sèn pa moneda stranhero), fungi komo bankero i konsehero di gobièrnu, emití bononan kòrtiku di 3 pa 12 luna, warda moneda i papelnan di balor di otro instansia i persona.
Akademia Popular Errol Scoop ta manda un pabien i gradisimentu pa tur partisipante. Un danki ta bai pa Morgan Isenia pa su koperashon via su kompania Morgan Online. APES ta gradisí tur dosente ku a pone nan tempu i esfuerso i a duna nan kontribushon pro deo na formashon di pueblo di Kòrsou, tur miembro ku tur siman tabat’ei pa hasi e preparashonnan, Nancy i Tico i tambe na Sentro di Bario Santa Maria ta bai un danki spesial. APES ta kòrda tur partisipante ku djasabra awor tin entrega di sertifikado na Sentro di Bario St. Maria entre 4 ‘or pa 7’or según un sistema di walk thru. Ta tene kuenta ku reglanan di Covid. Un petishon spesial pa tene kuenta ku e ora stipulá pa kada grupo. Pronto Akademia Popular Errol Scoop lo anunsiá su próksimo proyekto emansipativo.
Konosementu ta un arma poderoso pa avansá!
