Areglo nobo di MPB i UPB ta trese segregashon, ta pone miles di hürdó den problema finansiero; i ta oumentá skarsedat di bibienda pagabel na Boneiru
Den su último reunion regular di djamars 7 di mart, koalishon di MPB i UPB – a dal otro sla duru na bibienda pagabel. MPB/UPB a proponé pa oumentá preis máksimo di hür di tur kas sosial ku 25%, di USD 750 pa USD 937; i tambe a stipulá ku solamente un grupo chikitu di hürdó lo bini na remarke pa supsidio.
Solamente hürdó na FCB (Fundashon Cas Boneriano), ku ta manehá un parti chikitu (<7%) SO di tur bibienda na Boneiru, lo probechá di e areglo nobo pa supsidio di hür. FCB tin 600 kas, pero nan mes ta indiká ku tin nan tin un lista di espera di por lo ménos 1600 famia ku a pidi kas. Tur otro hürdó, ku NO ta hür for di FCB NO lo risibí supsidio pa logra baha nan gastu di bibienda. Tambe lo ta asina ku solamente hürdó di FCB ku tin un entrada mínimo lo probechá di e stipulashon ku máksimo 10% di nan entrada por bai hür di nan bibienda. Sobra habitante ku tin entrada mínimo, nan hür por kosta praktikamente henter nan entrada.
Gran mayoria di bibienda pagabel ta den sektor privá. Niun hürdó den sektor priva lo probechá di e supsidio di hür, ni di e stipulashon ku no por dediká mas ku 10% di un entrada mínimo na gastu di hür. Apesar ku Gobièrnu ta na altura ku FCB no por kumpli ku e demanda di bibienda sosial. Pues, un hürdó di FCB ku tin salario mínimo di USD 1236 i ta hür un kas preis di hür di USD 937 lo paga solamente USD 123.60 mensual na hür, ku ta di aploudí. Pero, un hürdó den mesun situashon finansiero lo paga e USD 937 kompleto pa luna pa mesun kas, si e ta hür di un doño privá. Ademas, e kalifikashon di nos bario nan den kategoria i preisnan máksimo ta pone ku doñonan privá chikitu di bibienda no por sigui konstruí den sierto barionan manera Antriol, Nort Salina, Rincon, Nikiboko, Tera Cora, lokual ta trese mas skarsedat di bibienda i segregashon den nos pueblo. Aserka, e bibiendanan aki no ta bini na remarke pa mesun alivio tampoko. Asina ‘ki, miles di hürdó lo kai den mas problema finansiero, miéntras ku e kantidat di bibienda pagabel disponibel na Boneiru lo bai baha.
Pa trata na salvaguardá nos Pueblo, Demokrat a introdusí un amienda ku lo a hasi e supsidio di hür disponibel pa tur hürdó abase di nan entrada, irespekto di ken ta doño di e kas, sea FCB òf otro. Pero lastimamente MPB/UPB a vota KONTRA di e amienda aki.
