Thanya Croes y Bruce Harms a bishita biblioteca pa haci entrega di un publicacion special. E duo dinamico aki a traha duro riba nan prome publicacion bou di Defiant Publications, un photo journal di e movimento social #tabasta.
Esaki ta un movimento social documenta na 2020, den cua hopi hende a expresa nan malcontento, frustracion y rabia pa e manera con ta maneha e problematica di abuso di mucha na Aruba. Un grupo grandi a exigi diferente cambio, entre nan mas castigo pa e personanan cu ta comete crimen cu ta causa trauma cerca mucha. Un otro exigencia ta pa e instancianan concerni traha optimalmente cu otro.
E publicacion ta un coleccion di potret den blanco cu preto. E fotografonan a capta e emocionnan di e demonstrantenan riba e dia di e manifestacion. Esaki ta duna un imagen di e desaroyonan y e cambionan social cu ta tumando luga na Aruba.
Thanya Croes ta consehero pa proyecto special di Ministerio di Asuntonan Social y Labor.
Un ehemplar lo bay den nos coleccion nacional na Arubiana y algun lo keda na biblioteca pa haci nan accesibel pa henter comunidad.
#tabasta
