E pesadia di Kòrsou ta kontinuá. Despues di e armanan kímiko uzá kontra pueblo den fòrti i e klestek obligatorio CHE/COHO, awor ta sigui “noodwet”. Rhuggenaath ku Martina, PAR ku MAN ta sigui demostrá ku pueblo di Kòrsou no tin niun klase di balor pa nan. Kòrsou ta simplemente un trampolin un “stepping Stone” nada mas.
Den e akuerdo “Landspakket Curaçao” Hulanda a skirbi ku e ta bai invertí strukturalmente den polis, wardakosta, duana, milisia kurasoleño, VKC, RST, marina real, i servisionan sekreto. Tur esakinan ta órganonan di akshon di kòntròl. Pa koroná e obra di pekadó, awor ta bini ku e “noodwet” pa silensiá pueblo i kibra tur posibel resistensia den tòm. Pa refreská memoria: “Noodwet” tabata pará pa bini komo “machtigingswet” for di den “Groeistrategie”. Den “Groeistrategie e “noodwet/groeistrategie” mester a sòru pa imponé eliminashon di lei di retiru i fleksibilisá leinan laboral na Kòrsou.
“Noodwet” ta un arma preventivo di Hulanda. Si bini resistensia di pueblo kontra e gòlpi di estado ku yama COHO e tin su kuerponan bou di mando militar i su NOODWET na su fabor pa kibra tur foko di resistensia. Resistensia sivil, di prensa di militantenan polítiko i sosial. No lubidá fòrti dia 24 di yüni último.
Kiko ta un “noodwet”? Un “noodwet” ta un lei kaminda ta poderá un gobièrnu òf un òf mas minister pa goberná temporalmente nan so, den un situashon èkstraordinario di krísis, sin mester konsultá parlamento. Pero asta den un situashon di krísis ekstraordinario aki ta tene debido kuenta ku e prinsipio di legalidat, demokrasia i ku derechi i libertatnan fundamental di hende.
PAR ku MAN ta konsiente ku e pueblo di awe novèmber 2020 no ta esun di 2017 dia nan a kue poder. Pueblo ta resistiendo fuertemente kontra e “noodwet” i kontra e kantidat di atrosidatnan di mal gobernashon di PAR i MAN. Nan maneho diktatorial, di non-disclosure, di regalá outonomia, di kadena di mentira i di baratio di 1 dollar.
MAN ku PAR a disidí di posponé tratamentu di e “noodwet”. E motibu ta pa splika mas mihó, pa splika mas korekto sin malinformá.
Awèl ta mésun gobièrnu ku a splika tokante e rampa na Kenepa i e benta di UTS i ku a hinka Kòrsou den guera di Hulanda ku Merka kontra Venezuela, ta bai splika mas mihó i sin malinformá tokante e Noodwet. E mésun gobièrnu di Insel Air, PSB, GIRO Bank, UTS, Kenepa, Mangrof di Corendon, RDK, Vastgoedbedrijf Nederland, Klesch. Pueblo definitivamente no tin konfiansa mas den PAR ku MAN ku Rhuggenaath i Martina na kabes. A kaba señores.
E kontesta i kondena kontundente di pueblo ta dia 19 di mart 2021. E pueblo fadá i traishoná definitivamente ya a manda PAR ku MAN kas pa semper. Kòrsou mester di un gobièrnu ku dignidat, ku orguyo propio, sinsero, transparente, íntegro, sobèrbè, sabidó, bon formá i patriótiko ku lo para e gòlpi di estado COHO i e “noodwet” i rehabilitá pueblo di Kòrsou hasie un pueblo orguyoso i ku dignidat. Pa Movementu Kousa Promé e lucha ta sigui pasobra Por Otro.
