Movemento Causa Prome ta entrega Proyecto di Tula na Presidente di Parlamento

Diahuebs 7 di september Movemento Causa Prome a haci entrega di un documento na Presidente di Parlamento, señora Charetti America-Francisca. E documento ta contene un proposicion pa un proyecto pa estatua di Tula den Punda.

Movemento Causa prome, reaccionando riba e nota na pagina 6 di e programa “Herdenkingsjaar Afschaffing Slavernij 2023-2024” cu dia 17 di augustus 2023 ta instala e estatua di e “naakte” Tula, a expresa nos obhecion riba e idea aki. Den opinion di Movemento Causa Prome, e forma cu a yega na e estatua aki y e estatua riba su mes, no ta cumpli cu criterionan pa un estatua pa un erue di e taya di Tula. 

Na mes momento Movemento Causa Prome kier duna un contribucion presentando un alternativa pa Corsou haña un estatua cu e pueblo aki realmente merece. P’esei Movemento Causa Prome a bin cu un proposicion pa un proyecto cu e meta pa yega na un estatua representativo di nos érue Tula cu ta pone pueblo en general, hobennan en particular y futuro generacionnan mira balor di Tula.

Basicamente e idea di e proyecto ta pa envolvi pueblo completo y nos propio artistanan den e proceso pa yega na un estatua di nos erue Tula. Hunto nos ta ban siña conoce bida, historia i lucha di Tula. Cu envolvimiento di pueblo y propio artistanan nos por yega na un estatua representativo. Un estatua cu ta crea respet, orguyo y balor propio di e yiu-di- Corsou. Un estatua cu ta inspira y motiva hobennan y e pueblo di Corsou pa sigui cu e lucha di emancipacion. Un estatua cu lo yuda reforsa identidad di e yiu-di-Corsou. Un estatua di Comandante Tula cu lo yena nos cu orguyo y duna nos forsa pa sigui lucha.