ORANJESTAD,Aruba
E meta principal di Stichting Monumentenfonds Aruba ta pa cumpra, restaura, huur y mantene edificionan monumental. Un di e retonan cu esaki ta trece cune ta e re-destinacion di un edificio monumental sin afecta su originalidad. Esaki ta un reto interesante cu SMFA tin actualmente cu e reservoir di awa na Kibaima. E tankinan aki sigur a hunga un rol den e historia di Aruba su industria. Un estudio di factibilidad ta e prome fase pa por yega na un plan di restauracion pa asina preserva e tanki nan aki tambe pa futuro generacionnan.
Aña pasa Stichting Monumentenfonds Aruba (SMFA) den cooperacion cu fundacion BOEi, di Hulanda, a haci entrega di un peticion pa subsidio na Rijksdienst Cultureel Erfgoed pa por realisa un estudio di factibilidad p’e tankinan di awa na Kibaima.
Na januari a ricibi e bon noticia for di ministerio di OCW di Hulanda cu e peticion a wordo aproba pa e subsidio di 35 mil euro. E realisacion di e estudio ta den man di Stichting BOEi den cooperacion cu SMFA y organisacionan local y lo tin un duracion di algun luna. Den e proximo simannan SMFA lo organisa encuentronan cu diferente stakeholders.
E idea ta pa por redestina e tankinan aki pa sea uzo pa agricultura inovativo, horeca, oficina etc. Una bes SMFA obtene e raport finalisa a base di e esaki lo bay over na busca partnernan y financiamento pa e proyecto aki y asina lo por ehecuta e restauracion di e tankinan.
E tankinan actualmente ta pertenece na gobierno di Aruba y ainda no ta conta cu proteccion monumental pero si tin atencion di monumentenbureau pa nan por haya nan status di monumento y seyo di proteccion.
Rond di añanan trinta a construi e waterreservoir na Kibaima pa por a manda awa na e red di San Nicolas y Oranjestad. E reservoir tin un capacidad di 3500 meter cubico originalmente. E diseño di e reservoir tabata den man di Van Stuivenberg cual mira for di ariba tin un forma di barbulet y ta un copia exacto di e waterpompstation na Curaçao. Esaki ta e prome edificio na Aruba construi den e architectura di Nieuwe Bouwen y Art Deco. Despues di tempo a agrega dos reservoir mas pa un capacidad total di 6500 meter cubico.
Stichting Monumentenfonds ta pidi un y tur cu lo por tin mas informacion tocante e reservoir di awa na Kibaima of fotografianan di antes di e tankinan pa comparti esaki cu nos. Por tuma contacto cu nos na info@monumentenfondsaruba.com of
582 40 14.
