E buki ‘Monument Bonaire’ di Wilna
Groenenboom ku 300 página i 640 foto ta e promé buki di referensia amplio
tokante estilonan di konstrukshon di e patrimonio di konstrukshon na Boneiru. E
outor ta spera ku e buki akí ta duna un kontribushon na mantenshon di e
patrimonio presioso akí di e isla. E outor ta presentá su buki di foto e siman akí
na públiko.
E promé parti di e buki ta duna un bista di shete estilo di konstrukshon lokal, te mas o
ménos 1970. Ku esei ta deskribí un periodo di mas o ménos dosshen aña, ilustrá ku
foto pretu ku blanku bieu i foto di koló kontemporáneo. Huntu ku kada estilo di
konstrukshon tin un pintura tékniko. Banda di deskripshon general pa kada estilo di
kontrukshon, hopi biaha kas, e outor literalmente i figurativamente a skohe ún edifisio.
Tin biaha hasta ta duna nos un bista paden di kas.
E di dos parti ta konta mas tokante funshon i uso di e edifisionan. E ta trata
konstrukshonnan di gobièrnu, manera Fort Oranje, Mangazina di Rei i e hòspital bieu.
Tambe e ta trata e diesdos lanthùisnan di Boneiru. Naturalmente misa i skol no por
keda afó. E relashon di hopi aña ku laman ta bini dilanti den un parti tokante torno, e
plasa di piská pintoresko i algun otro edifisio. Un lista detayá i ilustrá di material di
konstrukshon i téknika di konstrukshon ta forma e parti final. Un resúmen históriko ta
pone desaroyo di e estilonan di konstrukshon den perspektiva di historia di e isla.
E buki ta destiná pa tur hende ku ta sinti nan mes atraé na e kasnan i otro edifisionan
karakterístiko di Boneiru i ke sa mas di eseinan. ‘Monument Bonaire’ pa gran parti ta na
dos idioma: hulandes i ingles. Un parti chikitu, pero esensial, di e buki ta skirbí na
papiamentu.
Wilna Groenenboom ta presentá i firma su buki djárason 27 di òktober for di 19.30 na
Captain Don’s Habitat. Monument Bonaire’ ta un publikashon di Blue Jay Holding BV. A realisá e buki danki na un kontribushon finansiero di Prins Bernhard Cultuurfonds Caribisch Gebied i algun otro
spònser.
