Dòkternan di kas na Boneiru ta bai traha huntu ku e instituto di investigashon Nivel na Hulanda pa kombatí malesa infeksioso den un forma mas efisiente. Ku e meta akí – meskos ku na Hulanda – a establesé un sistema na Boneiru pa monitoreá plamamentu di malesa infeksioso: e Ret di Registrashon di Dòkternan di Kas Boneiru (Huisartsen Registratienetwerk Bonaire). Ku e informashon ku nan ta akumulá den e ret akí, por señalá oumento di malesa infeksioso na tempu i si ta nesesario por tuma medida. Esaki lo kondusí na mehorashon di salubridat públiko na Boneiru.
Pa por kombatí malesa infeksioso efisientemente, ta esensial pa sa kua ta e malesanan ku ta sirkulá i tambe kon rápido esakinan ta plama bou di nos poblashon. E Ret di Registrashon di Dòkternan di Kas ta sòru pa e informashon akí bira disponibel.
Kon e Ret di Registrashon di Dòkternan di Kas ta funshoná?
Nan ta akumulá informashon tokante problema ku salú di suidadanonan ku ta bai nan dòkter di kas pa esaki. T’asina ku e dòkternan di kas ta registra e problemanan di salú di nan pashèntnan den fail elektróniko di pashènt. Pa medio di kolekshoná informashon tokante salú di tur dòkter di kas na Boneiru, nos ta haña un bista bon i aktual di e malesanan infeksioso ku ta sirkulá na nos isla. Ku e Ret di Registrashon di Dòkternan di Kas Boneiru ta disponé di un ‘Early Warning System’, un sistema di alerta tempran pa malesa infeksioso.
Bo privasidat ta garantisá
Si bo dòkter di kas ta afiliá na e Ret di Registrashon di Dòkternan di Kas, nan ta akumulá informashon tokante bo salú ku bo dòkter di kas a registrá den e fail médiko. P’esei ta bon pa sa ku nan no ta akumulá nòmber i adrès di pashènt, pero solamente informashon kodifiká. E dòkternan di kas i Nivel ta tene nan mes estriktamente na e leinan di privasidat na Boneiru i Hulanda. Pa e motibu akí nunka konteo di persona ku un malesa infekshoso no ta dedusibel na persona.
Bo ke sa mas?
- Den sala di espera di konsulta di dòkternan di kas ku ta partisipá na monitoreamentu di malesa infeksioso, tin un poster ku informashon ku bo por wak.
- Riba www.nivel.nl/hrnc bo ta haña tur informashon tokante e Ret di Registrashon di Dòkternan di Kas.
- Bo por tira un bista den medionan sosial di e konsulta di bo dòkter di kas.
