Diahuebs atardi 30 di mei a tuma luga e tratamento di e ley pa yega na un RWZI
nobo den Parlamento di Aruba. Un momento cu mester ta di reflexion pa nos tur
segun Minister Arends. E minister encarga cu Naturalesa a cuminsa su discurso
bogando pa pone e debate politico un banda y pa pensa riba kico a trece nos na e
punto historico aki. Mester compronde bon ta pakico mester a bin hunto y traha
pa resolve un problema cu a permiti crece den pleno bista, te cu e la bira un
peliger pa salud publico y economia.
E situacion di RWZI lo pasa pa historia como un case-study di un modelo politico y
economico cu no ta sirbi. Aruba den su historia cortico a core tras di desaroyo
economico y progreso, pero sin pensa riba sostenibilidad. Nos pais a bay tras di un
sistema caminda no ta importa nada otro sino produci ganashi. Den e modelo ey
no tin luga pa naturalesa.
Awe tur hende ta spanta y indigna pasobra awa sushi ta drenta nos lama. Awa
sushi ta pone nos hendenan y turistanan den peliger. Awa sushi ta subi tera riba
caminda dilanti di hotelnan. Hotelnan di luho ta rondona cu awa preto. Y den
pleno centro di Oranjestad y San Nicolas tambe awa sushi ta sali tur caminda.
Diripiente nos a realisa cu nos no a tene cuenta debido cu e modelo economico
caminda “welvaart” a bay laga “welzijn” atras.
Pero no ta solamente sushi likido. Nos a haci mescos cu sushi solido. Pa hopi aña
nos a mira mangroven como algo sin balor y cu por wordo destrui libremente. Nos
a hasta traha un dump riba e mangrovennan na Parkietenbos. Te awe por mira
con e mangelnan ta lucha pa sobrevivi den un ambiente toxico cu nos a crea pa
nan. Na momento cu e ultimo prikichi a bay for di Parkietenbos, e no a causa
tristesa. Nos atencion tawata riba otro cos. Gobiernonan tur rond di mundo a siña
cu e forma aki di anda cu nos naturalesa y biosfera no ta sostenibel. Nos no por
sigui riba e caminda aki. Mientras cu mundo a spierta, na Aruba ainda tin esnan cu
no ta mira importancia pa protege e tiki naturalesa cu nos tin. E mesun
personanan cu lo mester duna cara ora nos drenta debate riba e ley cu ta duna
naturalesa tambe derechonan constitucional.
Loke no ta directamente na bista ta nos coralnan cu ta muriendo. Nos yerba di
lama tambe ta wordo menasa pa ambicion comercial. Mientras cu rond mundo
scientificonan ta haciendo todo lo posibel pa scapa loke tin na otro paisnan.
Pero no ta nos naturalesa so nos a neglisha y sacrifica den e ansha pa core tras di
mas placa. Nos a Pais a logra progreso grandi, pero na caminda nos a bay laga nos
grandinan atras. Nos mester cambia di ruta pasobra ta tristo cu pa decadas den e
presupuesto di Pais Aruba, ta pone fondo disponibel pa por ehempel solamente
pa menos cu 250 adulto mayor. Esey ta menos cu 1% di tur adulto mayor na Aruba.
Esaki ta un inhusticia social. Un inhusticia cu no ta aceptabel mas y no por sigui.
RWZI ta pone cu nos mester reflexiona. Tur loke cu Minister Arends a menciona ta
resultado di decisionnan cu a wordo tuma door di sernan humano. Tur ser
humano por haci fout. Tur comunidad di ser humano por haci fout. Pero p'esey
como hende nos tin capacidad pa siña.
"Ban laga e debacle di RWZI bira un les pa nos tur. Esaki ta cosnan cu no mag
ripiti mas. Ban laga tambe e dump di Parkietenbos keda den historia. Un capitulo
scur di nos historia caminda nos a permiti cu un otro grupo di nos hendenan
mester a biba den huma y holo stinki. Ban laga esey tambe pasa pa historia y no
ripiti nunca mas. Pero mas cu tur cos ban siña cu nos mester ta consciente y cu
nos tin e obligacion moral pa cuida esnan mas vulnerabel. Entre nan nos
naturalesa y nos adultonan mayor. Ban cambia di modelo economico y ban
cuminsa pensa cu welvaart y welzijn mester por cana hunto." — Minister Arends