ORANJESTAD,Aruba
Parlamento di Aruba diahuebs mainta a tene un reunion publico pa fiha su posicion pa loke ta e condicionnan cu Hulanda a pone den cuadro di un prestamo cu kier haci na Aruba como sosten di likides. Pa ricibi e ayudo financiero den forma di un prestamo na cero porciento di interes y pa cuminsa paga te aki 2 aña, Aruba mester bay di acuerdo pa wordo incorpora den e regimen di supervision financiero for di Reino cu ta conta pa Corsou y Sint Maarten for di 10-10-10. Ademas Hulanda kier bin cu un entidad hulandes cu practicamente lo ta gobernando e isla.
Tabata tin hopi reunion cu lidernan sindical, lidernan comercial y politiconan, como tambe Parlamento. E pensamento general ta cu ta trata di condicionnan desproporcional cu Hulanda kier impone pa brinda e ayudo financiero pa operacion di Gobierno y yuda esnan den sector priva. Awe den Parlamento a scucha finalmente for di Vice Prome Minister Bikker riba e posicion di Gobierno riba e asunto aki. Gobierno ta rechasa e proposicionnan di Hulanda.
Richard Arends di AVP ta bisa cu e condicionnan poni no tin ningun relacion pa e ayudo financiero di Hulanda. Loke a wordo proponi a bay en pugna di spirito di Statuut nos Constitucion. Esaki ta algo cu Parlamento no por acepta. No por cambia e ordo di Reino sin cana e caminda corecto pa yega na esaki. Parlamentario Arends a papia di un “Super Entidad” cu lo ta bay dicidi riba finanza publico, economia, enseñansa, aspecto social y husticia. Riba cualkier decisionnan cu e Super Entidad aki lo tuma, Parlamento no tin nada di bisa, pasobra Gobierno no lo tin full e autoridad mas.
Definitivamente, segun Arends, no por regla e tema aki via di articulo 38 di Statuut manera cu Hulanda ta propone. E legisladornan nunca a crea e articulonan di cooperacion entre Paisnan di Reino cu e pensamento pa laga organonan di Reino tuma over asuntonan di e diferente Paisnan. Un di e condicionan pa cooperacion ta cu mester tin un interes mutuo, mester tin necesidad ta tin uniformidad huridico (manera asuntonan di impuesto) y mester ta proporcional. Podise accepta sin mas e condicionan por parce cu sosten di likides den termino cortico ta garantisa, pero e por tin repercucionan severo riba termino largo, manera aumento di impuesto y reformanan cu lo wordo imponi door di un entidad na hulandes cu no conoce e contexto local y no sa kico cada sector por carga.
Den cuadro di e tema aki, un mocion a keda acepta den forma unanime. Den esaki ta urgi Gobierno pa rechasa den forma categorico e inclusion di Aruba den e Supervision Financiero di Reino y rechasa creacion di e Super Entidad cu lo tin competencia riba asunto netamento di Reino y yega na palabracionnan concreto pa e sosten di likides pa cumpli cu loke ta para den Statuut.
Aruba tin supervision caba cu ta wordo guia pa un ley local, sinembargo Hulanda kier un otro supervision cu ta bou guia di Reino como cu no a actualisa e ley di supervision actual. E Rijkswet ta totalmente diferente y por trece sistema bancario y mercado financiero di Aruba na peligro si apllica esaki di e mesun forma cu Corsou.
