Den porta di eleccion y den recta final di e campaña politico aki, ta bon pa nos para keto un rato y analisa e vision y metanan politico di esnan cu ta sinti nan mes yama pa representa e pueblo Arubano den Parlamento y eventualmente Gobierno. Semper den tempo di campaña politico hopi promesa ta wordo benta den laira, pero despues di eleccion hopi excusa ta wordo treci dilanti tambe pa no cumpli cu loke a priminti ora a bay busca e voto di confiansa.
Nos por corda con 4 aña pasa, durante campaña politico di e tempo ey, promesanan pa proteha esnan mas vulnerabel a wordo treci dilanti di tur banda. Pero declaracionnan manera “den 6 minuut nos lo cambia ley” nunca a haya un contenido real den e Gobierno di Gabinete Wever-Croes tampoco. Y na lugar di traha proactivamente pa cumpli cu e obligacion di proteha victimanan di abuso sexual, nos por a mira con ta saca delaster un tipo di excusa pa hustifica e fayo di no proteha nos muchanan manera mester ta.
Un Gobierno cu tabata tin como prome reto e tragedia di 2 angelito cu a wordo asesina cruelmente den man di un abusador, no por a haci nada realmente husto y fuerte pa proteha nos muchanan. Loke e Gobierno aki si a haci ta crea ideanan bashi pa haci espectaculo publicamente pa pone nan mes mustra bon, pensando den e siguiente campaña pa eleccion. Pero nos muchanan nunca a haya e husticia ni e proteccion real cu nan merece.
E situacion a para bira asina desespera cu un grupo di ciudadano comun a dicidi cu #TABASTA, y a bini hunto pa protesta y exigi e proteccion pa e victimanan cu Gobierno ta den obligacion di brinda. Protesta y demostracion di diferente indole a wordo organisa pa asina demostra nos gobernantenan cu nos pueblo ta demasiado hostina di e ineptitud di nos sistema hudicial ora ta trata di salvaguardia e derecho di esnan mas vulnerabel. Pero lastimamente Gobierno di sra. Evelyn Wever-Croes a keda hunga wega politico cu e problematica aki y te dia di awe nada realmente significativo y contundente a wordo haci den beneficio di e muchanan victima di pedofilnan.
E mesun Prome Minister cu den su tempo di oposicion a priminti cu den 6 minuut lo cambia ley pa asina victimanan di abuso sexual haya husticia, ta e mesun Lider di partido MEP cu awendia ta busca voto sin por a cumpli cu su promesa pa proteha nos muchanan, cu ta esnan di mas vulnerabel.
Aruba mester y merece hende serio den Gobierno cu ta ekipa nos trahadornan social cu un tipo di lista di espera pa ayudo inmediato wordo brinda. Di e manera aki lo por yuda baha e urgencia, na mes momento cu ta haci e labor di e trahadornan social mas eficiente y efectivo.