Camara di Comercio y Industria Aruba (KvK) a ricibi riba diahuebs 16 di mei ultimo un
delegacion di 18 companianan di Trinidad & Tobago conhuntamente cu e Trinidad & Tobago Chamber
of Industry and Commerce y e Trinidad and Tobago Manufacturers’ Asociation pa explora e mercado y
oportunidadnan di negoshi, y alabes fortalece relacionnan di comercio entre e Aruba y Trinidad &
Tobago.
E delegacion a representa e siguiente sectornan: construccion, cuminda y bebida, logistica, imprenta y
embalaje, quimico pa limpieza di cas y muebles di cas. E companianan originalmente a participa na un
mision comercial na Corsou for di 15 te cu 17 di mei, pero nan a tuma e oportunidad pa bishita Aruba
tambe riba 16 di mei.
E evento aki a tuma luga na Hyatt Place pa un dia completo. E reunionnan entre e companianan di
Trinidad & Tobago y comerciantenan local a cuminsa for di 9'or di mainta te 4'or di atardi. Durante e
reunionnan di matchmaking, comerciantenan di ambos pais a conoce otro di cerca y explora
posibilidadnan di colaboracion.
E mision comercial a wordo organisa riba iniciativa di ExporTT, un agencia di implementacion di maneho
cu ta resorta bou di Ministerio di Comercio y Industria na Trinidad & Tobago, den colaboracion cu KvK
cu e fin pa crea mas laso comercial entre Aruba y Trinidad & Tobago. KvK a asisti cu e reunionnan di
matchmaking y e contacto cu e companianan local y alabes a coordina e citanan ariba e dia di e mision
comercial aki.
KvK ta hopi satisfecho cu e evento aki y por mira bek na un evento exitoso, y alabes kier gradici tur e
participantenan pa nan interes y participacion na e mision comercial aki.
