ORANJESTAD,Aruba
Dialuna 3 di februari a tuma luga rueda di prensa semanal di Gobierno di Aruba. Durante di e rueda di prensa aki Minister Marisol Lopez – Tromp a elabora riba e vision di Ministerio di Desaroyo Teritorial, Infrastructura y Medio Ambiente y a amplia riba e aspectonan di desaroyo balansa y proteccion di naturalesa.
Ora cu ta trata desaroyo di Aruba hopi ta esnan cu kier pa stimula economia, sinembargo di otro banda tambe tin e necesidad pa conserva y proteha nos naturalesa. Pues ora cu mester tuma decisionnan, como mandatario ta importante pa tene esaki den balans, Minister Lopez – Tromp a splica.
Si mira durante e ultimo añanan, mas y mas comunidad ta expresa nan nivel di conscientisacion y preocupacion riba e balansa aki y e importancia di mihor calidad di bida. Gobierno di su banda tambe a sa di percura pa e aspectonan aki cana mas mihor cu ta posibel a traves di diferente iniciativa manera entre otro e Ruimtelijk Ontwikkelingsplan (ROP) cual Parlamento a aproba mas cu 10 aña pasa y cu mas o menos 2 aña pasa, ex Minister Otmar Oduber a pone enfasis riba esaki bek. Ademas a enfoca riba mehoracion di e proceduranan cu tin den e departamentonan di MinROIM na bienestar di comunidad, cual a wordo hopi neglisha durante ultimo añanan.
Pa conclui, Minister Lopez – Tromp a indica cu ta importante pa accentua cu e manehonan aki ta continua y lo sigui hiba un maneho cu ta tene cuenta cu areanan den comunidad cu tincu keda proteha. Naturalmente teniendo na cuenta cu e cartera aki no solamente ta encarga cu proteccion di naturalesa, pero e ta esun cu ta stimula economia tambe a traves di proyectonan y otorgamento di tereno cual ta un medio pa yega na mehoracion di calidad di bida di nos hendenan y creacion di trabou pa nos habitantenan.
