ORANJESTAD,Aruba
.Hopi hende for di tur parti di Aruba tin e custumber pa bay subi e trapinan na Hooiberg como training y tambe pa wak e bista bunita ora cu nan yega e top. Cu tempo e trapinan (plateaunan) a deteriora y esaki ta forma un peliger pa e bishitantenan di Hooiberg.
Considerando esaki e peticionan tawata pa drecha esaki. Miembro di parlamento sr Endy Croes y Ricardo Croes tambe a haci peticion na minister Oduber pa den e presupuesto di TPEF 2019 presupuesta un suma pa drecha cuminsa cu e promer fase di drecha e trapinan.
Minister Oduber a presupuesta un suma den presupuesto TPEF 2019 pa e fase 1 cu a wordo aproba anja pasa den parlamento di Aruba.
Despues di esaki DOW a wordo acerca pa tene un destaho publico y percura pa e proyecto aki wordo ehecuta. Departamento di Ontwerp & Planning a haci e preparacion di e proyecto y departamento di Uitvoer a supervisa e ehecucion di e proyecto.
Despues cu e destaho publico a tuma luga, e contratista cu a gana e bid tabata C2 Civil & Construction y e trabounan di construccion a cuminsa y a termina recientemente.
A basha un un capa di beton nobo riba e plateaunan existente y despues cu esaki a seca nan a ricibi 2 man di verf. Tambe durante e proyecto aki e gazebo a ser renoba completamente.
Pa loke ta e financiamento, e proyecto aki a wordo financia cu fondonan di TPEF 2019 di nos presupuesto.
Sin duda cu finalisacion di e proyecto aki ta contribui na mas movecion fisico den e area di Hooiberg y consecuentemente lo yuda na mehora e calidad di bida, salud y siguridad di tur e bishitantenan.
Minister Oduber ta contento cu por a ehecuta un otro bunita proyecto cu fondonan di TPEF. E proyecto aki sigur ta uno cu hopi hende lo beneficia for di dje y cu minister Oduber ta spera cu por sigui cu e siguente fase den embeyicimiento y mehoracion di infrastructura di Hooiberg.
Minister Dangui Oduber ta cumpliendo debidamente e entregando proyectonan manera presupuesta. Ta importante pa remarca cu esaki no ta un proyecto NOBO sino un proyecto di anja pasa cu debi na Covid-19 a cuminsa e anja aki.
