Huez a dicidi awe cu e Toque de Queda (TdQ) cu a wordo introduci riba 28 di augustus ultimo via un regeling ministerial, tin suficiente base legal y ta legitimo. Corte a dicidi cu e escogencia di gobierno pa introduci e (segundo) Toque de Queda ta razonable bao di e circunstancianan di e crecimento exponencial di e cantidad di contagio di corona. E TdQ no por wordo considera desproporcional bao di e circunstancianan aki.
E dos sospechosonan cu a wordo cita pa motibo di violacion di e TdQ, a wordo sentencia pa respectivamente servicio pa comunidad y un boet di 1000 florin. Manera conoci Ministerio Publico tabatin un otro punto di vista, pero huez no a sigui esaki. Ministerio Publico ta haci, awor cu huez a dicidi cu e TdQ ta corecto, un yamada urgente na personanan cu tin un boet di TdQ habri, pa nan paga esaki mas pronto posible. Ta trata di personanan cu a wordo ofreci un transaccion den e periodo di 28 di augustus 2020 y 22 di oktober 2020 pa violacion di TdQ.
Bo persona por paga e boet aki online via cuenta bancario 4000905 di Aruba Bank bao mencion di e parketnummer, e codico di pago y e number di ID. Bo persona por haci un afspraak tambe via nos website (www.omaruba.com) pa pasa personalmente na caha di Ministerio Publico. Si bo persona ta desea pa yega na un areglo di pago, por favor manda un e-mail cu informacion y number di telefon pa info@omaruba.aw.
