Ministerio Publico lo bende diesdos boto na findishi riba diabierna 24 di maart 2023. Ta trata di botonan cu ta na Marinierskazerne na Savaneta. Tur ta boto cu a cay den man di Kustwacht. E botonan aki no tin mester di wordo warda mas y por wordo bendi na esun cu ofrece mas cen pa nan.
Mescos cu tempo a bende botonan den añanan anterior, bo persona tin cu inscribi di antemano na Ministerio Publico. Esakinan ta e reglanan:
- Bo por inscribi te diabierna 17 di maart 2023 na Ministerio Publico via ann.angela@omaruba.aw. Bo por opta tambe pa yama sra. Angela na Ministerio Publico na tel. 521-4135. Despues di 17 di maart 2023 INSCRIPCION TA CERA.
- Ora di inscribi mester inclui:
– Nomber
– Fam
– Fecha di nacimento
– Pais di nacimento
– Number di ID (di bo ID, paspoort of rijbewijs)
– Number di telefon.
- Unicamente personanan cu a inscribi na OM mag di meld riba 24 di maart 2023 pa 10’or di mainta na entrada di Marinierskazerne pa wak e botonan y duna un oferta por escrito riba e boto cu nan ta desea pa cumpra.
- Ora bo presenta na porta di Marinierskazerne, bo mester mustra e mes ID cu bo a inscribi cu ne. Si bo no tin esey cu bo, bo lo no haya entrada.
- Muchanan no por drenta.
- Si bo persona resulta esun cu a haci e oferta mas halto, lo tuma contacto cu bo. Despues bo por pasa e placa na banco. Pago por solamente via TRANSFERENCIA BANCARIO. Bo mester pasa placa na banco. No por swipe ni paga cu cash mas.
- E boto ta wordo entrega una vez mustra e recibo di pago, e contrato di compra y e ID di e cumprador.
- E cumprador lo wordo informa despues tocante e fecha cu e por busca e boto. Ministerio Publico no ta duna ningun garantia riba e estado di e botonan. E venta ta bay ‘as is where is’. E cumprador mes ta percura pa transporte.
