Ministerio di Tráfiko, Transporte i Planifikashon Urbano (VVRP) huntu ku e kontratistanan CWM, MNO-Vervat i Aliansa ta kuminsá ku ehekushon di trabounan den kuadro di pone un kapa nobo den sierto kayanan di korsou

Deterioro di nos kayanan, ku a bira visibel den forma di burakunan den kaya, ta un resultado di falta di sufisiente fondo e último añanan pa hasi invershon di profundidat den nos kayanan, pero tambe e kantidat di áwaseru eksesivo ku a kai. Hopi áwaseru ta afektá fundeshi di nos kaya i pone ku esaki na sierto kamindanan ta sak i bira un buraku den kaya. Apesar di e desafionan aki Minister Jesus-Leito a hasi tur posibel pa yega na fondo pa por ehekutá e plan di emergensia i asina remediá e situashon agudo di nos kamindanan. Gobièrnu tei inverti Nafl. 900.000 pa realisá e Plan di Emergensha aki. Minister Jesus-Leito lo sigui traha pa yega na solushon pa e problema di fondo, ku di forma struktura por sigui hasi mantenshon di nos kamindanan.

Pa medio di e plan di emergensha ta:

1. Aselerá e trabounan pa yena burakunan den kayanan,

2. Pone un kapa temporal nobo pa algun kaya kaminda yena buraku so no ta yuda mas, i

3. Drecha algun kaminda di tera.

For di 14 yanüari último a sigui ku e trabounan pa yena e burakunan ku a surgi den nos kamindanan. A kuminsá atendé ku e burakunan riba kamindanan prinsipal pa despues bai den barionan kamindalo realisá trabou tambe na algun kaminda di tera.

Djaluna dia 1 di febrüari 2021 ta kuminsá ku trabounan na e kayanan kaminda djis yenamentu di buraku no ta yuda mas. E kamindanan unda trabou ta kuminsá djaluna 1 di febrüari i ta dura te dia 5 febrüari ta:

· Blomonteweg,

· Granaatapelweg,

· Monte Carmelo/Kaya Kazerne

· Bahamasweg/Haïtiweg.

Di 8 pa 19 febrüari 2021 e mas trabou lo traha riba:

· Kaya Jacob Posner (dilanti Building Depot)

· Kaminda Brievengat (na altura di Bonbini Minimarket)

· Kaya Macario Prudencia/Kaya Pachi Bakhuis.

Na e sitionan aki lo kita e asfalt bieu,stabilisá e sitio i pone un kapa nobo di asfalt.