PAHO un organisacion internacional di salud publico cu ta traha pa mehora salud di personanan na Americas, miembro di sistema di Nacionnan Uni. Ministerio di Salubridad Publico Aruba ta colabora regularmente cu PAHO pa inicia proyectonan di conscientisacion, cooperando cu e organisacion internacional aki cu tin sumamente hopi expertisio pa asina brinda mas informacion na comunidad y promove salud na nivel regional.
E cooperacion aki lo ta uno esencial pa yuda conscientisa riba e importancia di prevencion di malesa a base di estilo di bida sano. Cu sosten di PAHO, conhuntamente cu agencia di mercadeo local JDB, lo provee guia na e comunidad di Aruba pa hiba un estilo di bida mas saludabel.
Bo estilo di bida, ta e miho medicina!
E campaña lo wordo promovi bao nomber di ‘Bo estilo di bida, e miho medicina’ cu enfoke na reforsa nos sistema imunologico pa preveni malesa, como tambe brinda informacion y conscientisacion al caso na con pa preveni impactonan severo di malesanan manera Covid19.
Desde e comienso di e pandemia, algo cu a bini dilanti y cu gobierno hunto cu organisacion di salubridad ta hopi na altura di dje, ta e hecho cu comunidad en general ta sinti nan mes limita por medio di medidanan di siguridad pa combati Covid19.
E campaña aki tin como proposito pa duna cada individuo e libertad di hiba un bida mas sano, pa yuda cada un di nos crea habitonan pa mehora nos sistema immunologico, mas resistente na Covid19 y otro problemanan di salud, sin opresion ni restriccion. Simplemente brindando e comunidad di Aruba e guia necesario pa stimula un bida mas saludabel di forma gratuito.
Challenge gratis cu guia di Profesionalnan di Salud
E temanan cu lo wordo adresa durante e campaña aki ta Nutricion, Ehercicio, Drumimento, Humamento, Alcohol, Sobreuzo Digital, Salud Mental, Higiena y Comemento Emocional.
Den colaboracion cu diferente expertonan y profesionalnan den tur e areanan aki lo ofrece un 30-day Challenge pa tur interesado por participa GRATIS cu guiansa y tips di con por mehora den cualkier di e areanan aki den nan bida y haci un cambio. Den un Facebook Group priva esnan interesa den haci un cambio positivo pa mehora nan defensa por asisti na e challenge y sostene otro participantenan cu guia di expertonan den salubridad.
Mas informacion ta obtenibel ariba e website www.arubasaludabel.com pa yuda bo identifica cual topico ta di mas interes pabo y pa siña mas tocante di e campaña aki.
Comunidad di Aruba ta cordialmente invita pa forma parti di e programa aki activamente y tambe pa recomenda esaki na un otro persona cu bo ta haya lo ta algo positivo pa e forma parti di dje.
