Den cuadro di un maneho integral pa Good Corporate Governance a wordo lansa e programa piloto pa un “Corporate Governance Manual”. Cu esaki lo reforma y digitalisa acceso na informacion relaciona cu corporate governance pa companianan estatal y fundacionnan cu ta ricibi subsidio di Gobierno. Di e forma aki lo promove transparencia y un cultura di Good Corporate Governance dentro di sector semi-publico, y alabes ta sirbi e meta pa Gobierno como accionista eherce su funcion mas efectivo y eficiente.
E proyecto piloto aki ta wordo dirigi pa Comision Corporate Governance como tambe Themis Institute for Governance & Leadership, dirigi pa profesor Dr. Frank Kunneman.
“Integridad ta esencial pa e exito real cu ta determina caracter di henter un nacion. Den e programa di Gobernacion di Gabinete Wever Croes 2, nos a compromete nos mes pa den forma continuo y permanente mester enfoca na salvaguardia y promove integridad den henter nos comunidad,” Minister Geoffrey Wever a cuminsa ta menciona den ausencia di Minister Ursell Arends.
“Den conseho di Minister, y riba conseho di Commissie Corporate Governance, a determina e importancia pa structura y digitalisa e intercambio y acceso na informacion di companianan estatal y instancianan subisidia door di Gobierno.”
Introduccion di un Manual pa Corporate Governance ta un di e formanan pa nos por trata di eleva transparencia di proceso, cumpli cu e principionan di Behoorlijk Bestuur y sigura integridad.
Ministerio di Integridad y Gabinete Wever-Croes ta gradici tur companianan estatal como tambe fundacionnan cu ta participando na e proyecto piloto aki.
