Diamars, dia 21 di februari ta Dia Internacional di Lenga Materno cu UNESCO a proclama na aña 1993. E dia internacional aki ta pa preserva diversidad linguistico y promove educacion multilingual basa riba e idioma materno. Dia Internacional di Lenga Materno ta pone nos para un rato keto y reflexiona riba nos idioma materno Papiamento. En conexion cu e dia aki Minister Xiomara Maduro ta presenta hunto cu Janiro ‘Ataniro’ Eisden un programa ‘Papiamento tin Poder’. Meta di programa aki ta pa cuida y stimula e bon uzo di nos idioma Papiamento.
Pa e ocasion aki Ataniro, cu den su cancionnan ta promove nos idioma Papiamento, a hiba combersacion cu diferente persona den nos comunidad tocante e poder di nos idioma Papiamento.
Minister di Cultura ta enfatisa cu Papiamento ta nos patrimonio cultural, un di nos herencianan cultural cu ta carga nos historia, experiencia, cultura y ta muestra di nos identidad. Nos idioma ta importante den e comunicacion diario di nos tur. Hunto nos mester promove uzo corecto di skirbi’e y papi’e. Atrabes di nos idioma nos ta expresa nos sentimento, Papiamento ta inspira y motiva, Papiamento tin poder.
Dia 21 i mei proximo ta cumpli 20 aña cu Papiamento a keda oficialisa door di Parlamento di Aruba. Papiamento ta reponsabilidad di nos tur. Nos mester apreci’e, stim’e y cuid’e pa nos futuro generacionnan.
Ban haci uzo di e dia aki pa reflexiona riba e balor di nos idioma di Papiamento. E mandatario ta gradici tur e personanan cu a contribui pa realisa e programa aki. Minister di Cultura ta invita pa sintonisa TeleAruba diamars dia 21 di februari pa 7’or y 8’or di anochi na Diariotv e programa ‘Papiamento tin poder’.
