ORANJESTAD,Aruba
Durante e reapertura di Museo Arqueologico Nacional di Aruba (MANA) aña pasa, Minister Maduro a enfatisa cu hunto cu e reapertura, un era nobo y duradero lo cuminsa pa MANA. Trabounan a continua y a forma un ekipo dinamico cu expertonan di museo y cultura bou di guia di director ad interim Pancho Geerman. Otro colaboradornan di e team ta Renwick Heronimo y Ruby Eckmeyer.
Recientemente e team aki, pa medio di un concepto preliminario cu Renwick Heronimo a presenta e prome concepto pa un plan strategico titula ‘MANA: Manteniendo nos Herencia Bibo den Tempo’. Hunto cu e mandatario a presencia e reunion den forma personal y virtual representantenan di UNOCA, Banco Central di Aruba y di oficina di Minister Maduro.
Sr. Heronimo a haci un presentacion for di e punto di bista di un futuro museo como agente di cambio y dialogo. Esaki ta basa riba un definicion nobo cu Internacional Council of Museum (ICOM) kier usa pa adapta e concepto bieu di kico ta un museo.
MANA ta consisti di diferente edificio di gran balor monumental y historico. Meta di e plan di inovacion ta pa maximalisa e experiencia di bishitantenan den cada edificio y crea expresionnan cu ta conta storia di e edificionan, di famia Ecury y e vinculo bibo cu arkeologia di Aruba. Ta e intencion pa bay traha riba exposicionnan moderno, interactivo y digital, pa medio di cual ta expresa balor di naturalesa, obhetonan y placa den historia di Aruba. Continuidad di arkeologia tambe lo haya su luga den e exposicionnan nobo. Alabes exposicion virtual lo bay forma parti di e presentacionnan di MANA den futuro.
Pa loke ta historia y nificacion di placa cu tabata circula y ta circula na Aruba, Banco Central di Aruba lo ta un aliado principal den e proyecto aki hunto cu UNOCA.
Minister di Cultura a keda hopi impresiona cu e presentacion y ta reconoce cu MANA tin hopi mas potencial. E uzo multifunctional di cierto espacionan lo por sostene investigacion y documentacion di nos herencia cultural. E mandatario ta enfatisa cu den un futuro cercano nos comunidad y turistanan por disfruta di un ‘state of the art’ Museo Arqueologico Nacional Aruba.
