Companianan na Aruba cu ta cumpra servicio electronico y servicio di telecomunicacion, television y radio for di companianan estableci den exterior mester paga BBO/BAVP y BAZV entrante 1 di januari 2023 riba e suma di nan compra
Minister di Finansa ta informa den cuadro di implementacion di e ley di Plan di Impuesto 2023, entrante 1 di januari 2023 lo drenta na vigor varios cambio den nos leynan di impuesto. Un di e cambionan ta den e ley di BBO/BAVP y BAZV caminda a amplia e definicion di “servicionan” cu servicionan electronico y servicionan di telecomunicacion, radio y television pa motibonan di compliance. Alabes a amplia e reglanan pa cu e sitio unda ta duna servicio pa asina por determina cua compania tin e obligacion di paga BBO/BAVP y BAZV ora ta trata transaccionan entre companianan estableci na Aruba y companianan estableci den exterior.
Definicion nobo di “servicionan”
E definicion nobo di e servicionan cu ta cay bou BBO/BAVP y BAZV awor tambe lo encera e servicionan electronico y servicionan di telecomunicacion radio y television. Servicionan electronico ta por ehempel servicionan online di accounting, stockphoto/video/audio, website builder, skirbimento di documento, acceso na plataforma di data, download of mira pelicula online, download of scucha musica online. Bou servicio electronico no ta cay intercambio di informacion (conseho) via e-mail of mercancia (paña of sapato) cumpra online.
Servicionan di telecomunicacion, television y radio ta encera por ehempel: transmisionnan y recepcion di señalnan, texto, imagen y zonido of informacion via cable, ondanan radial, sistemanan optico y electromagnetico. E servicionan aki ta encera tambe traspaso y dunamento di derecho pa transmissionnan of pa ricibi señalnan por ehempel telecomunicacion, sms, acceso na internet y voicemail.
Regulacion nobo pa cu e sitio unda ta duna servicio
Minister Maduro ta enfatisa cu den e ley di BBO/BAVP y BAZV a introduci tambe un regulacion nobo unda a amplia e definicion di e sitio unda un compania ta duna servicio. Normalmente un compania cu ta estableci na Aruba ta paga impuesto na Aruba riba su servicionan ofreci na Aruba. Actualmente ta asina cu si e compania no ta estableci na Aruba y ta bende su servicionan na un compania di Aruba, e compania stranhero no ta paga impuesto na Aruba, paso e no ta estableci na Aruba.
Cu e regulacion nobo tin un “cambio di sitio unda ta duna servicio”. Ta considera cu e sitio unda e servicio ta wordo duna e caminda cu mester cobra e impuesto concerni. Esaki ta nifica cu ta cobra BBO/BAVP y BAZV na e compania di Aruba cu a cumpra e servicio for di e compania di exterior. E regulacion nobo ta valido pa servicionan electronico y servicionan di telecomunicacion, television y radio.
E situacion di cambio di sitio di servicio ta importante pa por determina cua compania tin cu paga BBO/BAVP y BAZV. E sistema aki ta uno conoci den e mundo di impuesto y ta wordo aplica tambe na Hulanda y ta conoci como “verleggingsregeling”. Ta importante pa remarca cu e ta aplicabel ora ta trata di negoshi entre comerciantenan “Business to Business” (B2B) y no “Business to Consumer” (B2C). Pues si un persona priva cumpra servicio na un compania den exterior, e persona priva no ta paga BBO/BAVP y BAZV.
Representante fiscal
E compania stranhero por nombra un representante fiscal (“fiscaal vertegenwoordiger”) na Aruba ora ta trata transaccionan di “Business to Consumer” pa asina e representante aki por actua na nomber di e compania stranhero. Consecuentemente e representante fiscal ta haci declaracion y paga BBO/BAVP y BAZV na Aruba pa e compania stranhero. E compania stranhero tin cu pone Inspector di Impuesto na altura ora e ta nombra un representante fiscal. Alabes e tin cu duna Inspector di Impuesto un copia di e carta di apoderacion na su representante fiscal.
Garantisa entrada di impuesto y compliance
E mandatario ta subraya cu e regulacionnan nobo ta garantisa cu Gobierno ta haya su “fair share” ora ta trata entrada di impuesto. Pa Departamento di Impuesto tambe e reglanan nobo ta sirbi pa mehora e compliance di parti di e contribuyentenan cu ta den liña di practicanan comun den e mundo di impuesto.