Minister Xiomara Maduro impresiona cu e proyecto di ’20 objetos: Una historia de Aruba y Curazao’

10 obhetonan cu ta conta e historia di Aruba y Corsow

Un exposicion cu ta haci un reflexion entre pasado y presente

Recientemente, Minister di Cultura tabata invitado special na e exposicion ’20 Objetos: Una historia de Aruba y Curazao’, caminda cu pa Aruba 10 obheto a wordo exponi na Bogota, Colombia. E meta di e proyecto aki ta pa cuminsa cu e combersacion di historia di ambos Pais, cuminsando di abou bay ariba. 

Obhetonan exponi

E 10 obhetonan cu a ser exponi pa Aruba ta conta e storia di nos Pais. Pa cuminsa, e Violin di Mo Tito cu e tabata usa pa toca den grupo di musica folklorico ‘Conhunto Folklorico Arubano’. Tambe, e Staf Indjan cu ta conta di nos antepasadonan indjan cu tin un importancia intercultural. E Carta pa Gezaghebber cu ta conta e storia di sclavitud na Aruba. Otro obheto cu tambe a ser exponi ta un Teblachi Spiel, representando con e ser femenino aki na Aruba tabata biba y ta mustra e feminidad cu tabata tin den e temporada di Lago cu a trece prosperidad economico y cu a influencia e idealnan di beyesa riba nos isla. Un Holoshi di Boto tambe a forma parti di e exhibicion aki contando e storia di con den añanan 60 y 70, Aruba tabata un di e exportadornan di koffie mas grandi na mundo e tempo ey. Un obheto tambe cu sigur no tabata falta tabata un Boter di Bols, cu ta simbolisa e importancia di Latino America pa e Hulandesnan pa e materia prima y oportunidadnan comercial. Lele, un palo di hala funchi, tambe a keda exhibi pa asina mustra e tradicion culinario di nos pais. Otro obheto tabata e Abacus, cu temponan aya tabata wordo usa pa haci calculo ora cu tabata haci negoshi. Un casuela tambe a keda exhibi cu antes tabata wordo usa pa traha pan bati cu ta un plato tipico di nos Pais. Finalmente, e Carnival Head Piece no tabata por a falta, dunando honor na e celebracion mas grandi di e cultura di nos Pais. 

Minister Maduro ta gradici Embahador di Reino Hulandes na Colombia pa e invitacion y ta felicita Joeri Oltheten cu ta e curator y ta lidera e proyecto aki, Renwick Heronimo cu ta e curator di Aruba, Prins Bernhard Cultuurfonds y tambe Fundacion Museo Arubano pa un exposicion exitoso cu a duna honor na locual cu ta di nos.