Diaranson mainta Minister Xiomara Maduro a lansa e campaña ‘Cumpra Local, Di Nos Pa Nos Mes’ den Caya Betico Croes dilanti di La Moderna. E meta di e campaña ta pa sostene nos comercio local y contribui hunto pa reactiva economia di Pais Aruba. Hunto cu e unidad IDEA di Departamento Economico, a traha riba un jingle y un video den cual nos artista local Jeon ta anima y concientisa e consumidor pa cumpra local. IDEA ta bay lidera e proyecto na unda lo entrevista varios comerciante dunando nan producto y servicio cobertura nacional. Cumpra Local lo brinda informacion valioso tambe pa e publico por sa mas di nos comercio local y e instancianan cu tey pa brinda servicio pa facilita comercio na nos Pais.
Beneficio di Cumpra Local
E crisis di COVID19 tin un impacto fuerte riba comercio na nos Pais. E medidanan pa cuida nos salud di Shelter in Place y e Lockdown tabata un sla fuerte pa comercio. Pesey Gobierno a traha pa brinda alivio fiscal y sosten financiero, pero awor mas cu nunca nos tur mester sostene comercio local pa asina economia di Aruba por wordo activa. E ta importante pa nos cumpra local pa asina nos por yuda comercio local surpasa e situacion di crisis. Den su discurso Minister Xiomara Maduro di Economia a informa cu segun datonan di SVB, 95% di e cantidad total di companianan na Aruba ta companianan cu tin 50 empleado of menos. E companianan aki ta duna empleo na 39% di e cantidad total di trahador na Aruba. Ora nos cumpra na un negoshi local, nos ta yuda e negoshi aki pa e por keda habri y mantene nan personal. Ora nos haci compras local nos ta inverti den nos economia local, e placa ta keda lora den nos Pais y asina nos ta crea un economia sostenibel pa nos Pais. Pesey nos mester cumpra local.
Ban duna otro un man – Di nos mes pa nos mes!
Minister Maduro ta haci un apelacion na nos comunidad pa ban yuda sostene nos comercio y asina contribui na economia di Pais Aruba. Specialmente den e temporada cu ta bini aki, laga nos bishita y cumpra cerca nos negoshinan local. Cu cada compra chikito of grandi, nos ta duna un aporte na nos economia. Nos hendenan di Aruba ta conoci pa nos forsa di coherencia, nos hendenan ta nos fortalesa, ban duna comercio un man pa asina hunto nos por lanta nos economia bek. Aruba ta nos Pais. Ta nos mes tin cu yuda nos mes na e momentonan aki. E mandatario ta enfatisa pa ban duna otro un man y Cumpra Local. Ban mustra compromiso cu nos Pais, cu nos comercio local y cu nos hendenan. Pasobra Aruba ta di nos tur y hunto nos mester traha pa lora economia di nos Pais, di nos mes pa nos mes.