Den luna di juli di ana pasa WEB y ELMAR a informa Gobierno di Aruba cu como consecuencia di e aumento di prijs di petroleo riba mercado internacional e prijs di awa y coriente mester wordo aumenta. Gobierno di Aruba a verifica tur calculo y cifra financiero y a duna un aprobacion di 6 luna pa aumenta e prijs di coriente, bow di condicion cu 1 februari 2023 mester revealua esaki, pues e aumento ta valido te cu 1 februari 2023. E aumento aki tabata necesario pa garantiza e suminstro di awa y coriente na Aruba.
“Mirando cu no tin un aprobacion di Gobierno di Aruba pa un ahuste di e prijs di coriente pa e periodo despues di 1 februari 2023, e facturanan cu ELMAR a emiti over e luna di februari 2023 ta den violacion di e concessievoorwaarden y nos a informa ELMAR na varios ocasion di esaki atraves di varios carta cu mi a manda ELMAR den nomber di mi mes como e minister encarga cu tarifa según e concessie y tambe den nomber di colega Minister Glenbert Croes cu ta encarga cu energia di Aruba”, segun Minister Geoffrey Wever.
Ayera Minister Wever a suministra un carta den nomber di Minister Croes y Minister Wever na Elmar pa informa cu nan tin te cu diabierna awor 31 di maart, 2023 – 12:00pm pa bin cu propuesta financiero pa nos por establece e prijs di coriente desde 1 februari. Prijs di coriente ta halto y ta afecta e costo di bida di tur nos cuidadanonan. Banda di esaki e ta un peso grandi pa gasto nan operacional di empresanan cu ta conduci inflacion directamente. Pa es motivo e no por ta asina cu un tarifa ta wordo cobra cu no a wordo aproba dor di Gobierno di Aruba.
Minister Glenbert Croes di su banda tambe ta den dialogo continuo cu Utilities, WEB y ELMAR pa varios siman caba y sa cu e empresanan ta trahando riba un propuesta pa Gobierno y ta confia cu pa diabierna e grupo di compañia estatal lo cumpli cu demanda di Gobierno pa bin cu un propuesta nobo.
