Den un conferencia di prensa minister di medio ambiente Ursell Arends ta indica cu e la keda notifica door Raad van toezicht di Serlimar cu e director mes a tuma su retiro, esaki ta un gran mentira di parti di minister Ursell Arends.
Informacion cu EAnews por a ricibi di trahadonan di serlimar ta cu aparentemente pa basta dia tabatin discusionnan entre e director di Serlimar y Raad van Toezicht di serlimar riba e opdracht cu tabata bin di cocolishi di minister Arends pa firma contracto nobo un biaha mas cu Ecotec. Esaki e director no a acepta pa firma mirando cu no ta mira e progreso pa mehoracion pa Aruba den situacion di desperdicio y cu e placa ta bay den caha di gobierno pa asina duna bek na e pueblo pa tin un miho bida.
Director Melitza Geerman a nenga di firma e contract di 4 aña pa dera sushi bou teranan di propiedad di Aruba, cu ta teranan cu basicamente mester a bay bek den man di Land Aruba.
Aparentemente e director na momento di a nenga esaki mesora per opdracht di minister di medio ambiente Ursel Arends , Raad van Toezicht a traha un carta y a kita e director di trabou y asina a termina cu e contracto cu lo a vence dia 31 di october venidero, pero a pidi e director bay mas trempan.
Aparentemente Serlimar ta ariba abou , presionnan fuerte ta bahando riba trahadonan di serlimar. Aparentemente tin un presion pa Nataly Wolf firma pa Ecotec haya e contracto, algun siman atras Nataly Wolf tambe a nenga di haci esaki , pero tin indicacion fuerte cu aparentemente e presion nan ta hopi halto y aparentemente e trahado lo a firma e contracto aki bou di un presion inmenso. Trahadonan nan Serlimar ta hopi rabia riba e echo aki y nan ta condena e situacion aki.
Segun e politico e no ta mete paso ta RvT mester tuma decision, esaki ta di boca pafo y no abase di e actonan real y presion politico cu ta ser haci den Serlimar aparantemente tin e trahadornan hopi disgusta.
Sinembargo mester bisa tin dos punto cu pueblo mester para pe, si realmente Nataly Wolf a firma e mester para personalmente responsabel pa esaki. Di dos e presion politico pa obliga un hende firma den porta di campaña ta keda un punto cuestionabel di integridad di un minister cu supuestamente ta para pa integridad y mas ainda tin e maneho di integridad na Aruba, pero e no ta practica ni un punto di integridad pa su mes.
Ta papia aki di un contracto di hopi placa unda cu un biaha mas pa mal decisionnan di Minister Ursell Arends pueblo atrobe ta esun cu ta paga pa un contract di bay dera sushi den subsuela di Pais Aruba, uzando terenonan cu mester a keda entrega na pueblo di Aruba pa haci proceso di gas. Pero e traidor di Aruba Minister Ursell Arends aparentemente a duna un grupito na Aruba pa dera sushi un biaha mas pa 4 aña siendo cu Aruba mes por maneha e parti aki pa placa por drenta den caha di gobierno mes y asina por duna pueblo bek e trankilidad economico.
Mirando e mal maneho pa varios aña di Minister Ursell Arends por bisa cu ta pre mira consecuencianan grandi pa medio ambiente na Aruba. Por laga e mandatario para personalmente responsabel pa esaki ?
