Maneho di transporte publico basa riba interes general y oportunidad igual
𝘗𝘦𝘳𝘮𝘪𝘴𝘰𝘯𝘢𝘯 𝘥𝘪 𝘗𝘶𝘦𝘣𝘭𝘰 𝘯𝘰 𝘱𝘰𝘳 𝘴𝘪𝘨𝘶𝘪 𝘤𝘪𝘳𝘤𝘶𝘭𝘢 𝘥𝘦𝘯 𝘮𝘦𝘴𝘶𝘯 𝘨𝘳𝘶𝘱𝘰
Un grupo di taxista a manifesta dilanti di Bestuurskantoor dialuna mainta pa mustra cu nan ta opone cambionan cu Minister Arends a introduci den maneho nobo pa loke ta permiso den transporte publico. Nan a para trafico y blokia transito pa asina pone presion pa evita e cambionan.
Den respuesta na e manifestacion, Minister di Transporte ta reafirma su compromiso pa asegura oportunidad igual pa esnan cu ta desea di yega na remarke pa un permiso di taxi. “E maneho nobo ta pa nos habri e sistema di permiso, crea oportunidad igual, para e negoshi di toko-den-toko y pone un fin na patronahe politico,” segun Minister Arends a informa.
Minister Arends a ricibi e carta for di cinco representante di taxista exigiendo pa revoca inmediatamente dos decisionnan ministerial, sin splicacion y sin niun argumento. Minister Arends a invita e representantenan pa un reunion diamars dia 6 di augustus 2024, pa scucha y delibera e argumentonan pa substancia nan exigencianan.
E cambio di maneho ta para e traspaso di permisonan entrante 1 di september 2024 y combati e benta ilegal di esakinan. Asina por stimula un sistema mas husto y transparente. E motibo di e decision aki ta pa crea oportunidad igual pa ciudadanonan por yega na remarke pa un permiso, na luga di mantene e situacion cu hopi permisonan ta keda circula den e mesun gruponan, limitando e oportunidad igual di otro ciudadanonan pa yega na remarke.
Durante hopi aña, permisonan di taxi a wordo bendi ilegalmente pa suma di te hasta 90,000 florin, creando un mercado clandestino cu ta kita e chens pa otro ciudadanonan tambe por opera legalmente den e industria aki. E sistema di permiso di taxi pa añas a crece “krom”, den cual a pretende cu permiso ta nan propiedad y por bira herencia personal siendo cu tur permiso ta di pais Aruba.
“Nos a tende e preocupacionnan di manifestantenan awe mainta. Nan tin nan punto di bista y como Minister di Transporte mi tin e responsabilidad pa crea un ambiente mas husto. E berdad tambe ta cu permisonan di taxi ta un di e permisonan cu mas a wordo uza pa patronahe politico, pa campañadornan,” e minister a remarca.
Mirando cu esaki ta un practica di politica tradicional, nos ta anticipa cu den e dianan nos dilanti lo tin politiconan oportunista cu lo kier mantene e sistema di patronahe. “Mi ta sigur cu lo tin politiconan tras di e negoshi di permiso di taxi,” segun Minister Arends a declara. “E weganan aki, manera fixmento di vergunning, ta kibra nos Pais, pasobra ainda tin politico cu ta busca puntjes y defende sistemanan coruptivo,” Minister Arends a duna di conoce.
Traspaso di permiso no ta un derecho di taxista. Ta na e Minister di Transporte pa a base di su maneho traspasa of no traspasa. Cu e decision ministerial di 31 di juli 2024, Minister di Transporte a anuncia e cambio di maneho entrante 1 di september 2024.
E regulacion nobo ta enfoca na habri caminda pa mehoracion significante den e industria di taxi. Cu un sistema mas husto y transparente, Ministerio di Transporte por aborda otro desafionan manera pensioen y condicionnan laboral cu finalmente lo beneficia tur chauffeur di taxi.
E decisionnan ministerial ta obtenibel riba Publico.aw.
