Minister Ursell Arends ta lamenta cu e tema cu e reunion cu a keda yama den parlamento ta trata di un recorte den SABA, pero e reunion no a keda atendi como tal. Oposicion cu tanto a reclama y insinua cu tin recorte den SABA no por produci un documento cu realmente tin un recorte di subsidio den SABA su operacion.
Por a tuma nota cu oposicion a haci hopi promocion unda cu a bay radio y bay noticiero pa haci politica, pero politica di mentira. Segun Minister Ursell Arends e ponencia cu lo tin recorte di subsidio den SABA ta completamente falso.
Pa loke ta trata maneho di cama di SABA loke cu a pasa di 2017 pa awo a dura minister Alex Shwengle tres aña prome cu e por a bin cu un maneho pa adultonan mayor. Sinembargo cu e gobierno actual tin un draft y e maneho actual ta keda presenta den luna di juni y ta keda presenta na tur e stakeholdernan pa nan pone nan granito den e pensamento y vision di e maneho nobo.
Sinembargo na 2017 SABA a ricibi un crecemento di subsidio di 1.3 miyon cu ta un aumento di 6% compara cu e aña anterior. Na e mes un momento e mes un gobierno di gabinete Mike Eman a bay di acuerdo cu SABA ta baha di cantidad di 279 cama na 230 cama cual ta un reduccion di 49 cama cu ta 21% di cama menos pa SABA.
Sinembargo desde cu pueblo di Aruba a dicidi cu nan kier un cambio pa miho, Minister Dangui Oduber a ricibi e cartera di SABA y den e tempo di 2018-2019 SABA a mantene un cantidad di 226 cama. Na 2020 cu ta e inicio di e pandemia cu ta 2021 y 2022 SABA a maneha menos di 200 cama y e subsidio a keda reduci pa motibo di e pandemia.
E suma a baha debi na e pandemia na 2020 cu 1.3 miyon, 2021 cu 1.2 miyon y 2022 cu 1 miyon , cada un di esakinan den aña nan separa ta recortenan cu a keda haci den salario di e trahadonan y na ningun momento ta papia cu a kita esaki di e subsidio di SABA su maneho , pero cu ta e trahadonan di SABA a entrega esaki den e momentonan dificil cu Aruba tabata pasando di entrada di Pandemia.
E mes un director di SABA a manda un carta pa director di finansien y ta ilustra claramente unda e recortenan a keda haci cu ta 5% di salarionan, bashipremie, vakantiegeld, reparatiepremi y gelijkbedrag. Pa loke ta trata e cuido y materialnan pa SABA 0 florin a keda corta.
