Situacion di awa ta serio pa mundo henter y pa Aruba tambe. Ta bon pa habitantenan di nos isla tuma un tiki tempo pa comprende pakico tin tanto atencion pa e asunto aki y kico tur esaki ta nifica pa nos isla. Tin algo serio andando ora cu miles di representantenan di tur pais rond mundo bin hunto na United Nations Headquarters na New York pa discuti e tema di awa. Ora nos Rey Willem Alexander bin personalmente pa enfatisa cu e asunto aki mester di atencion urgente, y ora e delegacion di Reino Hulandes cu ta esun mas grandi cu tur otro, ta bira momento pa nos na Aruba puntra nos mes ta kico ta pasando cu awa?
Na Aruba nos ta rondona pa awa y nos a lanta den luho di awa potabel. Nos ta confortabel cu e pensamento cu nos tin awa cu ta entre e mihonan di mundo. Tiki ta pensa cu esaki ta un privilegio grandi, un luho cu nos tin pa casi 100 aña. Nos tin tur confiansa cu semper lo tin awa di bon calidad pa nos hendenan y cu esaki semper lo wordo entrega te den nos cas. Despues di tanto aña di luho a pone nos pensa cu problema mundial di awa no ta nos problema. E ta un problema pa paisnan pober y subdesaroya. E pensamento ey ta robes. Ta robes tambe pa pensa cu esaki ta problema pa pueblonan cu ta biba den desierto, y cu falta di awa no ta nos problema mas. E pensamento ey banda di ta robes, e ta hopi peligroso tambe pa nos tur.
Realidad di nos isla ta cu e cantidad di awa potabel den nos subsuelo ta suficiente solamente pa menos cu 0.04% di tur habitante di nos isla. Ora conta e cantidad di turista cu nos ta ricibi, e cantidad di awa den nos subsuelo ta cubri menos cu 0.003% di tur loke nos mester. Aruba den e sentido ey no ta diferente na pueblonan cu ta biba den desierto. Pa nan y pa nos, awa potable ta un recurso natural limita. Pero esey no ta tur.
Awa por ta un peligro grandi tambe pa un isla. Cambionan di clima ta pone cu nivel di awa rond di mundo ta subi (Sea Level Rise-SLR). Nos economia completo ta depende di turismo, y esey ta depende di lamanan cu poco poco ta perde tereno. Mientras SLR ta sosode gradualmente, e peligro mas grandi ta cambio di clima cual ta pone tambe cu cantidad di eventonan natural destructivo lo bira mas y mas. Y cu tempo tambe e eventonan ta bira mas intenso, causando mas destruccion. Aruba a biba den confortabilidad cu nos ta pafo di e ‘belt’ di horcan, of manera nos ta bisa semper “nos ta un isla bendiciona’. Pero e ‘belt’ aki tambe ta cambiando. Aruba mester tuma paso na tempo y ya pa lunas caba ministro di Naturalesa a cuminsa aserca experto y instancianan internacional riba e tereno aki.
Ayera na New York e delegacion di Reino Hulandes cu casi 50 representante di diferente departamento di Gobierno di Hulanda a scucha atentamente un discurso di Ministro Arends riba e vision di Aruba y riba e peliger di awa pa Aruba. Representantenan di nivelnan mas halto di gobierno Hulandes por a scucha for di minister Arends e pasonan cu Aruba a tuma caba, y di e expertonan internacional cu awor a bin para banda di Aruba den nos esfuerso pa atende cu e asunto na un forma structural, pa defende nos pais y nos hendenan.
Hulanda ta lider di e iniciativa na Nacionnan Uni y Aruba ta tumando un rol activo den esaki. Hulanda por ta orguyoso di e pasonan enorme cu Aruba como un partner den Reino den Caribe a tuma caba den un periodo cortico. Esaki a wordo bon ricibi.
Entre esnan presente pa e discurso por menciona entre otro Prins Jaime de Bourbon de Parme cu ta Climate Envoy di Hulanda, Burgemeester di Rotterdam Ahmed Aboutaleb, Director General di Internationale Samenwerking Kitty van der Heiden, y Sarah Oey cu ta representante hubenil di Climate Council di Hulanda. Aruba ta chikito, pero na eventonan asina nos ta traha nos aliadonan y hunto Aruba y Reino Hulandes completo lo por ta lidernan den mundo riba e asunto di awa. Awa ta amigo y peliger. E diferencia entre un y otro ta sinta den e forma con nos atende cu’ne.
