Parlamentario Marco Berlies tambe a dirigi algun palabra den conferencia di prensa di fraccion di MEP unda cu kier a duna algun remarca di e proceso di e ley di transporte publico por a encamina un caminda hopi mas miho, segun e parlamentario. Un dialogo sigur tabata na su luga, sinembargo na momento cu a sinta y reuni cu e grupo di taxistanan por a compronde cu e mandatario a reuni cu solamente cu representantenan cu ta representa mas of menos 70 taxista pero na Aruba tin alrededor di 460 taxista.
Pa parlamentario Marco Berlies ta hopi importante cu na momento cu cambionan bin di e forma aki mester inclui mas hopi taxista cu ta posibel pa por dialoga e problemanan y e puntonan cu tin riba mesa. Na momento cu un persona ta dialoga cu otro semper por yega na un acuerdo mutuo y cu respet unda cu por yega na solucionnan y acuerdonan pacifico. Na momento cu ta exclui personanan y of gruponan semper lo haya cu bo mes como mandatario ta provoca.
Parlamentario Marco Berlies ta condena cu por a mira minister Ursell Arends ta sali pafo y ta yama e taxistanan pa cartel ta un parti cu no ta cay bon bou di e taxistanan. Ta kere firmemente cu mester hiba dialogonan cu respet y sinta na mesa y yega na otro pa asina haya un solucion y yega na acuerdonan bon.
Parlamentario Marco Berlies tambe a pone atencion riba e conferencia di prensa y cu tin minister nan cu ta sospechoso y cu ta den corupcion unda cu su persona a interpreta cu minister kiermen cu ta papia di casonan di permisonan di taxi. Mirando esaki na mes momento parlamentario Marco Berlies ta manda minister Arends algun pregunta.
Parlamentario Marco Berlies tin e deseo di sa di Minister Ursell Arends si tin contacto y of conexion cu ministerio Publico OM cu parlamento no sa di dje, e pregunta aki ta bin debi cu no tin ningun minister cu ta sospechoso of ex ministernan ta sospechoso di locual cu ta trata permiso di transporte publico. Parlamentario Marco Berlies kier un claridad di loke minister Arends a trace padilanti debi cu ta un punto sumamente fuerte pa bisa den un conferencia di prensa.
Na mes momento mirando ful e procedura di minister Ursell Arends a tuma luga a dicidi di manda e mandatario preguntanan via di parlamento di loke cu a sali den prensa y na mes momento ta spera un contesta rapido na e preguntanan cu a bay pa e mandatario.
Dia minister Arends a drenta como minister na aña 2021 e mandatario a yama e maneho di pasado coruptivo. Den e caso aki e pregunta ta keda si Minister Ursell Arends tambe e firma permisonan cu ta traspaso di permiso durante di e temporada inicial cu a traha como minister di transporte.
Si mester mira kico ta loke e mandatario a indica unda ta yama e maneho anterior coruptivo, pero si e mes a firma algun permiso y traspasa permisonan e parti aki tampoco no ta mustra bon pa e mandatario di integridad. Parlamentario Marco Berlies a manda diferente preguntanan basta fuerte pa e mandatario di transporte publico y di integridad. Parlamentario Marco Berlies ta kere ta importante pa tin tur claridad unda cu ta pidi rapportnan y un bista con minister ta atende cu e maneho.
Tambe por a tuma nota cu minister Ursell Arends a basa su mes maneho riba emocion mientras cu ya caba ta conoci cu e draft di e maneho a sali dia 14 di december y e mocion a sali 18 di december por bisa cu ya caba e maneho tabata practicamente cla, e ora con e minister por basa su mes riba e mocion siendo cu e maneho lo ta practicamente cla dia 14 di december siendo e mocion a Sali dia 18 di december.
Parlamentario Marco Berlis no por compronde cu minister kier traha su maneho abase di un mocion, pero si ta asina lo bin hopi mas mocion pa asina duna mas direccion pa locual ta e minister su maneho. No ta logico cu un mandatario ta sali bisa un barbaridad asina unda cu ta traha un maneho basa riba un mocion, esaki no ta sosode nunca, un mocion ta un deseo di parti di parlamento cu ta spera cu gobierno por tene cuenta cu ne. Ta di lamenta cu minister Arends a uza un mocion pa trata di hustifica su ponencia y su accionnan den su maneho mientras cu esaki sigur no ta e caso.
Fraccion di MEP ta hopi preocupa cu e situacion aki y ta spera cu minister Ursell Arends por contesta preguntanan di parlamento den un termino di tempo di 3 siman cu nan mes den ministerraad a propone pa parlamento ricibi.
Minister ta papia cu lo a aproba un ley pero no tin ningun ley a yega parlamento, parlamento no ta na altura di ningun contenido. Loke mester sosode ta cu parlamento mester ricibi e ley y studia esaki y vota pa esaki , no por bisa cu a pasa un ley siendo no tin ningun ley cu parlamento a ricibi.