Minister Plenipotenciario mr. Ady Thijsen a topa y papia na stadhuis di Leiden cu burgemeester di Leiden Henri Lenferink.
Den e despacho di burgemeester Lenferink, minister Thijsen a duna un introduccion di su vision pa cu Aruba y Arubahuis. Cu e ta bsihitando diferente municipionan (gemeentes) pa mira riba cual tereno por tin cooperacion cu Aruba. Sr. Thijsen a bisa cu durante di tur su bishitanan y encuentronan ela nota cu cada municipio tin nan experticio y hopi di nan ta para habri pa sondea posibilidadnan pa coopera. ‘Nos relacion cu Gobierno Central di Hulanda ta hopi bon, pero nos kier explora otro terenonan tanto cu e municipionan, provincianan, hogeschool y universidadnan. Tur esaki pa mira unda tin tereno pa traha hunto y crea un situacion win win pa ambos partido,’ asina minister Thijsen a bisa. Y un biaha mas ela ripiti e mensahe cu su vision y mision ta pa Aruba y Arubahuis ta mas visible na Hulanda y tambe na Union Europeo, sigur cu banda di e funcion di Minister Plenipotenciario, e ta alabes Representante di Aruba na Union Europeo.
E combersacion a bai riba e relacion den Reino cu segun minister Thijsen awor ta hopi bon. Ela bisa di tin hopi confiansa den Secretario di Estado pa Asuntonan di Reino Alexandra van Huffelen. E mandatario a bisa di a nota cu Van Huffelen tin hopi comprension pa e islanan.
Burgemeester Lenferink a puntra riba e situacion cu Venezuela. Minister Thijsen a bisa cu e ainda e situacion ta preocupante y cu e fronteranan ta cera. E situacion a crea un fluho grandi di Venezolanonan cu ta bin Aruba, hopi biaha ilegal y cu esaki ta trece desbalansa riba e mercado laboral. Tambe e cerada di frontera a frena a importacion di fruta y berdura. Antes tabata tin Arubiano ta planta, pero awor e Arubiano ta dependiente di fruta y berdura den supermercado, cu hopi biaha ta caro. Minister Thijsen: ‘Interesante ta pa tende cu tin hopi hoben ta pensa pa sigi un estudio den e direccion di agricultura; un desaroyo cu mi ta apoya cien porciento. Esaki tambe ta conta pa cria di bestia y piscamento. Den esaki mi ta mira un rol importante pa e sector comercial chikito y mediano, den hulandes MKB. Hunto cu otro partners por duna e hobennan structura. Specialmente cu despues di Covid, hopi persona a scohe pa bira ZZP’er,’ segun minister Thijsen.
Manera ta e caso den su otro encuentronan cu burgemeesternan, sr . Thijsen a toca e tema di “vergrijzing” na Aruba y e reto cu esaki ta trece cune pa e sector di salubridad. Burgemeester Lenferink a bisa cu e problematico aki tambe ta hopi grandi na Hulanda y segun sr. Lenferink ainda Hulanda no tin un respuesta adecua riba e situacion aki. Pero cu Leiden tin un ventaha grandi, tin hopi scolnan cu ta ofrece estudionan den e sector di cuido y salubridad, di VBO, Hogeschool te cu Universidad. Burgemeester Lenferink: ‘Leiden tabata trahando riba un proyecto pa transforma un di su hospitalnan cu hopi camber y apartamento pa ubica refugiadonan cu ta interesa pa traha den cuido. Esnan interesa ta haya un apartamento, educacion y un lugar di stage ta wordo regla. Ja caba nos tabata tin compromiso cu scolnan y hospitalnan. E renobacion di e localidad tabata cla, pero e guera na Ukraina a start y tur e lugarnan mester a wordo usa pa refugiadonan for di Ukraina,’ asina burgemeester Lenferink a splica.
Minister Thijsen a remarca cu e projecto aki unabes cu e cuminsa di nobo, lo ta hopi interesante pa studiantenan Arubiano, cu tin e ventaha cu nan ta domina e idioma Hulandes. Tambe e mandatario a añadi cu recientemente cu e bishita di minister di Enseñansa di Hulanda Robbert Dijkgraaf na Aruba a firma un acuerdo pa duna mas sosten na Aruba riba e tereno di enseñansa. EPI na Aruba tin un studio pa enfermeria riba nivel MBO, pero e studiantenan no ta haya trabao den hospital Horacio Oduber, pasobra e curiculo di EPI no ta segun e standard di e hospital. Akinan nos tin trabao pa haci, segun Minister Thijsen.
Finalmente a haci e palabracion cu lo sigi un follow-up unda lo bai papia cu scolnan MBO, pero tambe cu scolnan HBO y tambe cu burgemeester Lenferink a bisa cu e ta habri pa unda cu Leiden por, brinda sosten na Aruba. E mandatario a gradici burgemeester Lenferink pa esaki y tambe pa e recepcion hopi ameno. Despues a sigi intercambio di regalo como recuerdo di e bishita di minister Ady Thijsen na burgemeester di Leiden Henri Lenferink.