Aruba no a haya aanwijzing
Conseho di Minister di Reino (RMR) a dicidi awe diabierna 21 di October durante di nan reunion pa no duna Aruba un aanwijzing. Esaki Minister Plenipotenciario di Aruba mr. Ady Thijsen a bisa na final di e reunion di RMR. Minister Thijsen a bisa di ta contento cu e decision aki. ‘Mi a bisa semper na comienso di e proceso aki cu nos mester keda positivo; tin diferencia di opinion, pero esey ta normal. Van Huffelen a duna espacio y nos ta haya cu esey ta nesesario tambe pa nos por splica otro e diferencianan. E decision di RMR pa no duna Aruba un aanwijzing ta hopi bon. Nos ta sigi verder y van Huffelen a bisa cu nos ta bai awor pa 2023. Mi ta convenci cu nos ta bai logra esey tambe,’ asina Minister Thijsen a bisa.
E mandatario a sigi bisa cu si por mira na comienso di e proceso unda Gobierno di Aruba na 2017 a haye confronta cu un debe grandi y na 2020 a logra yega na un surplus riba e presupuesto. Minister Thijsen: ‘Pero e pandemia a trece cune cu a bin debenan grandi. Loke e Secretario di Estado ta referi na dje ta debenan cu Aruba a haci pasobra mester a fia placa di Hulanda pa sobrebibi e pandemia, mescos cu hopi otro pais na mundo. Un punto importante ta y mi ta kere cu esey a convence Hulanda tambe con un pais como Aruba cu a bai plat door di e pandemia, mester a fia hopi placa di Hulanda. Nos a baha 128 miyon di nos deficit den dos pa tres aña pa casi nada; pa 25 miyon. Bo ta mira e esfuerso grandi cu Aruba a haci; un trabao inmenso y mi ta kere cu Hulanda sa esey tambe. Pesey nos ta gradici nan tambe pa e comprencion ey. Semper nos ta keda traha hunto y asina demostra cu Aruba ta un pais madura.’
Minister Thijsen un biaha mas a bisa di ta convenci cu mescos cu Aruba na 2020 a yega na un surplus, esey tambe lo ta e caso na 2023. Esaki tambe ta debi cu Aruba su turismo ta bayendo hopi bon, sin conta cu lo bai bin otro desaroyonan economico cu por acelera economia di Aruba.
Banda di e parti di finanzas publico den e RMR di awe tambe a papia riba clima y con Hulanda y e paisnan di Reino den Caribe lo mester anda cu e problematico aki. Sr. Thijsen a menciona cu Minister Rob Jetten pa Asuntonan di Clima y Energia lo ta interesa pa tene un conferencia riba e tema aki y cu kisas esaki lo por tuma lugar na Aruba. Esaki ta un topico, segun Minister Thijsen cu ta rekeri cooperacion entre paisnan, mirando con cambio di clima ta afectando partinan di mundo. Segun e mandatario e cooperacion tambe ta cu institutonan manera IMF y Ministerio di Finanzas di Hulanda pa mira unda por duna sosten na Aruba pa tin un finanzas publico sano.
Por ultimo Minister Thijsen a bisa cu Aruba ta trahando duro cu e “Landspakketten”. ‘Mi ta sigi esaki di cerca. Riba tur tereno: enseñansa, economia, labor y salubridad publico. Akinan Aruba a haci algo casi milagroso. Durante e pandemia Aruba mester a corta gasto di salubridad publico cu 60 miyon pa aña. Djis pensa un rato kico esey kiermen, pero Aruba a logra toch. Esey ta demostra tambe cu nos por; e no tabata na su lugar pasobra corta riba gasto den un pandemia ta hopi dificil. Pero mi ta kere cu den futuro ora cu esaki pasa y cu nos a siña hopi di esaki, cu sigur riba tereno di salubridad publico por traha hunto cu Hulanda,’ asina Minister Plenipotenciario mr. Ady Thijsen a declara na final di e reunion di RMR.
