‘Nos como Aruba lo mester uni forsa, tanto gobierno y e sector priva – no solamente den e sector di cuido – pero tur sector di nos economia. Bin cu incentivo pa stimula Arubiano pa regresa nan pais. Traha na condicionnan di trabao atractivo, asina cu e persona tin un escohencia. Esey na mi aparecer ta e caminda cu nos mester tuma!’ Esaki tabata e mensahe di Minister Plenipotenciario mr. Ady Thijsen den un discurso na e bolsa “Care Caribbean” den WTC na Den Haag. Na e bolsa tabata tin diferente organisacionnan y institutonan di e sector di salubridad di Aruba, Curaçao, St. Maarten, Boneiro, Saba y St. Eustatius. Nan presencia na “Care Caribbean” ta pa medio di informacion purba interesa y busca profesionalnan di origen Caribense den salubridad pa bin traha na e parti Caribense di Reino Hulandes.
Minister Thijsen cuminsa su discurso bisando cu e ta contento cu e initiativa aki pa duna atencion na e sector di cuido y bienestar general na e islanan. En especial cu e proposito pa motiva Arubianonan pa regresa Aruba pa traha den e sector di salubridad. ‘Pakico esaki ta hopi importante? Pasobra e cantidad di personan na Aruba cu ta bandona e mercado laboral (vergrijzing) ta aumentando. Den futuro lo mester di hopi mas profesionalnan pa duna e cuido nesesario. Esaki riba su mes ta un razon legitimo pa duna atencion na dje,’ asina minister Thijsen a bisa.
E mandatario a sigi bisa cu pa motibo di e “vergrijzing” Aruba lo mester di miles di hende pa haci e trabao di esnan cu ta baha cu pensioen. ‘Ta wordo calcula cu Aruba den un futuro no mucho leu lo mester di 20 mil trahador pa mantene e nivel di crecemento economico actual. E combinacion di e “vergrijzing” y e indice di natalicio abou, loke ta wordo indica como crecemento natural, pa haci cu hopi di e trahadornan aki lo mester bin di afor di Aruba. Ki consecuencia esaki por tin pa un pais chikito manera Aruba, nos por a mira den añanan 90, door di e boost di turismo. E poblacion di Aruba a crece di 60 mil na 1986 ora cu Aruba a haya su Status Aparte na 110 mil awor. Importa trahador for di exterior ta trece tambe cierto risico cune. Segun e tratado di Europa pa Derechonan Humano (EVRM), e trahador despues di tres aña trahando na Aruba tin derecho pa manda busca su famia. Si nos por multiplica e cifra di 20 mil cu factor 3, nos ta yega na un cantidad di 60 mil habitante. Esaki lo pone un presion enorme riba e facilidadnan manera: vivienda, scol y bo infrastructura,’ segun sr. Thijsen.
‘Esaki ta e motibo cu mi ta boga pa nos hendenan regresa nan pais. No ta un tarea facil. Aruba mester compete cu condicionnan di trabao di Hulanda. Tambe hopi hoben tin un fiansa di estudio na euro. Nos como Aruba lo mester uni forsa, tanto gobierno y e sector priva – no solamente den e sector di cuido – pero tur sector di nos economia. Bin cu incentivo pa stimula Arubiano pa regresa nan pais. Traha na condicionnan di trabao atractivo, asina cu e persona tin un escohencia. Esey na mi aparecer ta e caminda cu nos mester tuma!’segun Minister Thijsen den su discurso.
Finalmente Minister Thijsen a haci un apelacion riba e sector di cuido di Aruba pa haci mas uso di initiativanan, manera “Care Caribbean” pa yega na personal bon cualifica, cu experencia y cu ta motiva pa duna e cuido mas bon posibel na e pueblo di Aruba.
E potretnan ta cortesia di Arubahuis
