Na Nieuwspoort na Den Haag Minister Plenipotenciario mr. Ady Thijsen tabata tin un encuentro cu burgemeester di Heerlen Roel Wever. Un cita cu wordo recomenda pa Gobernador di Limburg Emile Roemer durante di un bishita di Minister Thijsen na Maastricht.
E razon particular pakico Minister Thijsen a desea di papia cu burgemeester Wever, ta pasobra Heerlen un tempo tabata un ciudad hopi rico mes door di e minanan. Desde cu Gobierno di Hulanda a dicidi pa cera e minanan, esaki a trece cune cu e unico pilar economico di Heerlen a cai den otro. Cu e consecuencia cu hopi hende a keda sin trabao; hopi pobresa y tiki perspectiva pa actividadnan economico nobo. Un situacion cu den cierto manera por compara esaki cu San Nicolas, despues di cierre di LAGO y cu te ainda e factor economico mas grandi di San Nicolas cu ta e refineria no ta den operacion.
Burgemeester Wever a splica e situacion cu despues cu e minanan a cera, Gobierno di Hulanda a bin cu alternativa, manera establicimento di e oficina principal di Belastingdienst seccion “buitenland” Fondo di Pensioen ABP y Oficina di Estadista (CBS). Segun sr. Wever tur e iniciativa aki no a yuda mucho pa Heerlen crece na e nivel prome cu e minanan a cera. ‘Nos a start un projecto pa Heerlen Noord cu industrianan chikito y den e sector innovativo. Mi por bisa cu e bario a cuminsa mira un progreso grandi. Otro projectonan tambe ta dunando bon resultado manera terenonan commercial bieuw, cu nos ta purba na desaroyonan pa haya un otro bida comercial. Den e sector di logistica, Heerlen ta faborece di su localidad pa cu Alemania. Tambe tin hopi actividad ta tumando lugar por ehempel cu e Universidad Technico di Aachen, cu riba su mes ta un Universidad hopi grandi,’ segun burgemeester Wever.
Tambe sr. Wever a bisa cu Heerlen ta purba di stimula e sector di turismo rond di e region di Landgraaf. Minister Thijsen a bisa cu Aruba tin un experticio tremendo riba e tereno di turismo y cu kisas Aruba por brinda sosten na Heerlen pa desaroya nan sector di turismo.
Minister Thijsen a duna sr. Wever un splicacion cortico di e relacionnan den Reino y e retonan cu ta riba mesa pa e aña aki, manera e cuestion di exclavitud, e deficit democratico den Reino y por ultimo e “geschillenregeling” cu ta temanan cu ta hopi actual. Tambe minister Thijsen a papia riba e impacto di Covid pa Aruba. Un lockdown cu a causa hopi daño na e industria turistico di Aruba, cu ta e unico pilar economico di e isla. Pesey segun sr. Thijsen ta di suma importancia pa Aruba diversifica su economia.
Por ultimo burgemeester Wever a encurasha Minister Thijsen pa haci un bishita di trabao na Brightlands Smart Service Campus na Heerlen cu ta un comunidad di comerciante, investigador y studiante y conhunto ta desaroyo servicionan den e ramo di A.I. Inteligencia Artificial cu por drecha e calidad di bida.
Minister Plenipotenciario a keda hopi impreciona cu e combersacion ameno y informativo di e burgemeester di Heerlen. Ela gradici sr. Wever pa e boluntad pa por a topa y papia cu otro. Minister Thijsen a haci entrega di un regalito como aprecio pa e tempo brinda na su persona.
