E tayer sosial na Saba ta haña finansiamentu garantisá e periodo di gabinete akí. Asina minister Carola Schouten (Maneho di Pobresa, Partisipashon i Penshun) a anunsiá awe durante su bishita di trabou na Hulanda Karibense.
Durante e bishita di trabou akí na Hulanda Karibense minister Schouten ta bishitá Saba komo promé. Aya el a bishitá entre otro e tayer sosial ‘The Garden’, unda persona ku ta alehá di e merkado laboral ta kultivá berdura i fruta pa e poblashon lokal. ‘The Garden’ ta ofresé lugá na nuebe persona. Sinembargo tin falta di rekurso finansiero stabil. Minister Schouten pa e motibu ei ta ofresé te 2025 un presupuesto garantisá pa ‘The Garden’.
Minister Schouten: “Ta importante pa tur hende por partisipá segun kapasidat. Kada hende ta balioso i tin algu pa añadí. Definitivamente mi a mira esei na ‘The Garden’ tambe. E empleadonan ku mi a papia kuné ta traha ku plaser i dedikashon. Un persona a papia di ‘teamwork’ pa mantené ‘The Garden’ operashonal. I konhuntamente nos mester hasié tambe. P’esei gabinete durante e periodo di gabinete akí kier garantisá finansiamentu pa brinda e tayer sosial akí un futuro. Despues nos ta bai papia ku otro tokante finansiamentu struktural.”
Lonneke Schut, direktor di Saba Reach Foundation (for di kua ‘The Garden’ ta forma parti di dje a bisa): “E tayer sosial aki na Saba tin un balor agregá grandi pa motibu ku e ta un lugá na unda personanan ta haña un segundo oportunidat i na mes momento ta traha riba desaroyo i kresementu. Sosten finansiero stabil ta mas ku bon biní.”
Di dos tayer sosial
Ademas e minister a anunsiá ku e kompania di trabou i desaroyo Weener XL di Den Bosch (Hulanda Oropeo) lo desaroyá huntu ku Saba un proyekto piloto pa un di dos tayer sosial riba e isla. “No ta tur hende por traha den ‘The Garden’. Ta trata di trabou den solo ku ta físikamente mas pisá. Direktor di ‘The Garden’ kier habri un di dos tayer sosial unda por traha obra di man pa bende riba e merkado lokal. Gabinete kier sostené i finansiá e proyekto piloto.” E resultado di e proyekto piloto tambe lo forma parti di e kombersashonnan tokante finansiamentu struktural.
