Diaranson mainta, durante un rueda di prensa, Minister di Husticia y Asuntonan Social Sr. Rocco Tjon a firma un MOU conhuntamente cu Jeugd en Zeden Politie (JZP), tres psicologo cu ta traha na Centro Ortopedagogico (OC), KIA, Directie Voogdijraad, y Family Justice Center (FJC). Di e forma aki ta bay garantisa cuido y guia pa e victima, y na mes momento lo percura pa un calidad halto di investigacion.
Un momento hopi importante pa Ministerio di Husticia y Asuntonan Social, mirando cu e MOU aki ta muestra di e motibo pa kico a scoge pa pone e dos ministerionan aki hunto. Cu e MOU aki, ta logra pa diferente profesionalnan di e parti hudicial como tambe e parti social traha hunto pa asina trata un problematica grandi cu pais Aruba ta confronta. Algun luna atras a scoge specificamente pa percura cu no solamente e Zeden Rechercheurs haci e opleiding di “studioverhoor”, pero tambe profesionalnan di e otro instancianan, pa asina percura cu dos aspecto den cuadro di e problematica aki por haya su debido atencion.
Banda di esaki, e psicologonan tin un rol hopi importante den e parti di e cuido y e parti emocional pa e victimanan, na momento di e preparacionnan cu ta tuma luga prome cu un mucha mester bay wordo interoga. Na mes momento esaki ta eleva e calidad di e investigacion cu ta wordo haci y pa e motibo ey tambe a conta cu presencia di Ministerio Publico, caminda nan tarea y nan rol tambe a wordo ancra den e diferente palabracionnan cu a wordo firma. Di e forma aki lo bay percura cu e mucha cu a pasa den un evento di trauma ta haya e guia y e ayudo durante e interogacion y tambe despues, door di e psicologonan. Esaki tambe ta percura pa e calidad di e caso cu Ministerio Publico ta presenta dilanti di un huez ta wordo salvaguardia.
Por ultimo, hopi biaha ta scoge pa inverti un bes so den un opleiding y despues ta laga esaki un banda, mientras e calidad di e cosnan ta keda cambia, pa e motibo aki e rol di FJC ta hopi importante, pa asina por keda enfoca constantemente riba e parti di educacion, curso y workshops. A base di e palabracionnan cu tin aworaki den e parti di intervencion, e ta hopi importante pa tur e profesionalnan aki bin hunto un bes pa luna, pa asina garantisa e calidad y e desaroyo cu tin riba e tereno aki, keda bon manteni y tambe haya su debido atencion. E mandatario a keda sumamente contento cu e logro aki y a gradici tur e profesionalnan envolvi, pa e gran trabou cu ta wordo haci.
