Minister Rocco Tjon: Ta haci un yamada na tur esnan cu tin un boet habri pa paga esaki

Recientemente, Ministerio Publico hunto cu CEA a inicia e accion pa asina por cobra e boetnan cu tin habri. A base di esaki a tuma nota di diferente pregunta y preocupacion cu a bin di parti di pueblo pa cual Minister di Husticia y Asuntonan Social sr. Rocco Tjon a duna su reaccion. 

Manera ta conoci siguridad den trafico ta algo sumamente importante, mas y mas pueblo mes ta pidi pa trece mas siguridad den trafico. Pa e motibo aki, tin diferente iniciativanan den pleno ehecucion pa percura cu esaki por ta e caso. Un di nan ta pa percura cu esnan cu comete un infraccion den trafico paga e boetnan pa cu esaki. Ta asina cu actualmente tin ocho mil caso cu ya caba tin un sentencia, sinembargo, e personanan cu a comete e infraccionnan aki, ainda no a paga pa esaki. Pues di e ocho milnan aki, 2500 persona a ricibi dos recordatorio caba pa haci e pagonan aki, pero mirando cu e pagonan no ta tumando luga, a dicidi pa inicia cu e accion aki. Di e forma aki, ta percura cu e personanan cu a comete e infraccionnan aki ta para responsabel y ta cumpli cu e sentencia cu a wordo dicta door di hues. Asina por bisa cu banda di e otro iniciativanan manera concientisacion y prevencion, cual Cuerpo Policial ya caba ta dunando hopi atencion, ta percura tambe pa eleva siguridad di trafico a traves di e accion aki. 

Dentro di poco, Gobierno di Aruba lo inicia cu un proyecto pa loke ta autonan cu no ta sigura, caminda lo bay apunta un tercer partido pa maneha e parti cu ora ta kita un auto for di caminda, esaki por wordo poni na un luga specifico. Di e forma aki ta percura cu mas y mas Cuerpo Policial por kita autonan for di caminda cu no ta cumpli cu tur e rekisitonan manera e parti di seguro. Cifranan cu a ricibi ta mustra cu un gran parti di tur e accidentenan cu ta tuma luga, ta envolve autonan cu no ta sigura, cual ta afecta e siguridad den trafico pero tambe tin consecuencianan financiero pa esnan cu ta involucra den e accidentenan aki. 

Pues pa loke ta trata e accion di Ministerio Publico conhuntamente cu CEA, Ministerio di Husticia y Asuntonan Social ta haci un yamada na tur esnan cu ya caba tin e sentencia y a haya e recordatorionan pa paga esaki, pa haci esaki lo mas lihe posibel. Esaki por wordo paga na Ministerio Publico of na warda di polis na San Nicolas cu carchi, of por haci e pago online.