Dialuna mainta, Minister di Husticia y Asuntonan Social Sr. Rocco Tjon, a reuni cu e Fiscal Mayor nobo Sr. Eradus como tambe Alto Comisario Sr. Arnhem, entre otro riba e evaluacion pa loke ta trata parada di flambeu. Banda di esaki a reuni tambe cu e director di Elmar riba diferente topiconan den cuadro di eleva siguridad riba nos isla, caminda a tuma e decision pa pone camara na cada palo di luz pa eleva siguridad di e participantenan y mirones durante e temporada di carnaval. Adicionalmente, a papia tambe riba e proyecto di Veilige Barios, caminda tur cos a wordo aproba dos siman pasa pa asina instalacionnan por cuminsa e luna nos dilanti pa loke ta iluminacion den e diferente barionan cu a wordo aproba den presupuesto.
Manera ta conoci, Cuerpo Policial a indica cu tawata tin mas detencion compara cu aña 2020, sinembargo e tipo di incidentenan e aña aki tawata menos pisa cu na aña 2020. A conta cu un total di 19 detencion pa diferente tipo di incidente. Un di e incidentenan cu mas a bin padilanti tawata disturbio pa orden publico, entre otro buracheria. Mester bisa tambe cu pafo di e ruta tawata tin diferente unidadnan di Cuerpo Policial activo, manera e unidad di motor, kende a haci un tremendo trabou. Cuerpo Policial a indica cu mas y mas e mensahe ta yegando na nos comunidad, mirando cu mas y mas hende ta haci uzo di nan amigo didi, pues si a consumi alcohol nan ta percura pa no stuur. Cuerpo Policial ta satisfecho cu e comportacion en general di tur esnan cu a participa di un manera of otro na e parada di Flambeu.
Pa por sigui eleva e siguridad durante carnaval, Gobierno di Aruba hunto cu Elmar, ta bay participa na un proyecto piloto caminda lo bay ekipa tur e palonan di luz cu ta riba e ruta di carnaval, ambos di playa y san nicolas, cu ta wordo maneha door di Elmar, cu camara pa asina eleva e siguridad pa participantenan pero tambe pa mirones durante paradanan di carnaval. Elmar tin e insfrastructura caba disponibel pa por percura cu e rutanna aki ta bay ta ekipa cu e camaranan pa asina garantisa mas siguridad durante e temporada di Carnaval.
Por ultimo, e mandatario a indica cu aunke cu e 19 detencionnan durante e parada di flambeu a logra contribui cu un total di 11.400 florin na caha di pais Aruba, e meta di e programa di Faya bo Haya, sigur no ta pa trece placa na caha di pais Aruba. E meta su tras ta pa por garantisa siguridad pa un y tur, pa asina tur hende por yega nan cas sano y salvo.
