Recientemente Minister di Husticia y Asuntonan Social Sr. Tjon a reuni cu SEPPA y un grupo di Arumillers pa asina delinea y sondea ki posibilidadnan tin pa e Arumillers na momento cu nan retira di nan funcion como Arumil.
Minister Rocco Tjon, a duna di conoce cu e reunion entre sindicato y e grupo di Arumillers a bay hopi bon, caminda a logra delinea y sondea algun posibilidadnan pa Arumillers por wordo ubica un caminda specifico pues papiando di e “uitstroom mogelijkheden”. E mandatario a sigui splica cu e tarea di bin cu posibilidadnan pa Arumillers ta un obligacion di Aruba segun e landspakket . E tarea aki ta cay bou di Ministerio di Asuntonan General, sinembargo for di Ministerio di Husticia sigur tambe lo kier asisti den esaki.
E deseo di Arumil ta pa crea un funcion nobo caminda unabes nan caba cu nan trayecto como Arumiller nan por transferi den e funcion aki y asina duna un man na Ministerio di Husticia. ‘For di parti di nos Ministerio nos kier bay explora posiblidadnan pa nos por yuda den e trayecto aki a traves di un comision di trabou y duna Arumillers tambe participacion den esaki pa wak con lo por yega na un posibilidad pa cu nan’ e Mandatario a expresa.
Ademas, por bisa cu na e momentonan aki tin un documento riba mesa cu ta trata e “recht positie bij indiensttreding overplaatsing naar land voor Arubaanse Militie”. Segun e mandatario, e documento aki no ta algo di awo, y a yega di wordo trata den pasado pero lamentablemente sin ningun fruto, pues ta e meta di Ministerio di Husticia y Asuntonan Social pa repasa esaki y delinea con su Ministerio por duna nan participacion pa por bin cu cambionan necesario pa cu e “rechts positie” di Arumil.
Por ultimo e mandatario a termina bisando: ‘Nos ta wak bek riba un bon reunion, caminda dentro di poco lo institui e comision di trabou cu lo bay haya representacion di e defensa di Arumil, Departamento di Recurso Humano (DRH), Departamento di Legislacion y Asunto Huridico (DWJZ) y Ministerio di Husiticia’
