Minister di Husticia y Asuntonan social sr. Rocco Tjon, a habri e siman cu un conferencia di prensa di Gobierno di Aruba, pa asina pro-activamente presenta e cifranan di criminalidad. E cifranan ta bin directamente for di Cuerpo Policial, specificamente for di un ekipo cu ta presente na tur delito, pa asina nos por conta cu un bon bista di e cifranan y asina compara esakinan cu e añanan anterior. E cifranan tin un indicacion positivo y ta mira un reduccion den diferente tipo di criminalidad na Aruba.
Manera ta conoci, Cuerpo Policial ta den pleno reorganisacion, un di e departamentonan cu ta bay wordo reorganisa por completo, ta e departamento di informacion. Esaki ta hopi importante riba nivel strategico, pero tambe riba nivel operacional, y tambe pa por logra haci e comparacionnan pa loke ta trata e cifranan aki.
Pa loke ta e reduccion, esaki tin di haber cu decisionnan cu ta wordo tuma riba nivel strategico den justitieel veiligheidsberaad y e strategisch grensoverleg. Tambe, e tin di haber cu e inversionnan cu ta tuma luga den material pa cu personal, como tambe proyectonan di camara y radar entre otro, cu ta percura pa eleva siguridad. Na final di dia, e trabou ta keda un trabou di hende, y sin e dedicacion di tur e Agentenan Policial, e reduccion den e cifranan no lo por tawata posibel. Asina por bisa tambe cu algo cu a resalta den e cifranan, ta cu e percentahe di casonan cu a wordo resolvi ta hopi halto.
Dos proyecto sumamente importante, pa por a logra e cifranan aki ta e proyectonan di camara di siguridad y radar. Manera ta conoci, e diferente fasenan di e poyecto di camara di siguridad ta den pleno ehecucion, y lo sigui inverti den esaki pa mehora esaki a traves di tecnologia, palabracionan y personal cu ta bay percura pa monitorea e imagennan aki 24ora pa dia.
E di dos proyecto ta e proyecto di radar, di cual e di cuater radar a wordo adkiri, y a ricibi e consehonan for di tur e departamentonan hudicial como tambe departamento di natuur en milieu, di e sitio caminda esaki ta bay wordo poni, cual ta positivo. Pues muy pronto e di cuater radar lo bay wordo instala, cual ta mara na tecnologia mas avansa, pa asina e personal por haci e analisisnan mucho mas miho y asina intercepta contrabandanan cu ta purba di drenta Aruba, mucho mas eficiente y eficaz.
Por ultimo, e mandatario a indica cu lo bay sigui inverti den tecnologia, informacion y inteligencia, como tambe den personal, pa asina percura cu por sigui reduci e cifranan pa e siguiente añanan nos dilanti. Na mes momento, a manda palabranan di pabien na henter Cuerpo Policial pa e trabou incansabel cu nan ta eherce pa eleva siguridad den nos comunidad, y cu alabes ta celebrando nan di 37 aniversario.
Comunicado Minister di Husticia y Asuntonan social sr. Rocco Tjon
1 comment
[…] Source link […]