Minister di Husticia Rocco Tjon tambe ta minister di Asuntonan Social y Respaldo den e parti aki ta cay bao di e maneho di e mandatario. Den e temporada aki salud mental a hunga un rol hopi grandi bao di hopi hende. Sinembargo Aruba conoci un solo instancia cu ta keda cubri door di gobierno y e restonan ta particular cu hopi hende mes mester paga.
Sinembargo e lista na respaldo ta largo y e servicio cu mester keda duna na momento cu un persona ta pasando den dificultad e no ta haya esaki. Hopi persona ta bay respaldo pa nan haya e sosten di nan preocupacion, pero esunnan cu ta den e dip e momento ey no por wordo atendi. Aunke tin un sistema pa evalua cua caso ta mas critico cu otro, pero na momento cu bo ta den un dip esey realmente no tin un distincion. Esaki sigur ta hunga un rol riba e persona na e momento ey y hopi escenario por cambia depende si e persona tin famia, amigonan cercano.
Minister Tjon den conferencia di prensa despues cu a haya e pregunta di eanews di respaldo a duna di conoce cu e ta mira e necesidad y pa e motibo aki mes na december di aña pasa a firma e protocol entre tur e stakeholdersnan cu tin e tarea hopi importante riba e salud mental na Aruba. E motibo di e union aki ta pa kita e presion riba e cuido specialisa cu ta e derde lijn y haci e cuido di salud mental mas accesibel na e eerste lijn. Actualmente FADA tambe lo bay cambia nan business model unda cu lo cuminsa enfoca riba e parti di salud mental debi cu e ta importante bao di nos comunidad.
Minister Tjon ta duna di conoce cu tin diferente plannan presupuesta pa por logra yega na un solucion den termino largo, pero pa loke ta e preocupacion cu tin pa e lista di espera na e momentonan aki a haci un investigacion riba dje y tin un propuesta di un proyecto con lo por atende cu esaki den corto plaso, pero loke ta un realidad, ta cu e tin un aspecto financiero mara na dje. Segun minister Tjon e parti financiero ta e parti cu ta deliberando riba dje pa mira cu si for di e presupuesto actual lo bay financia esaki of ta mira kico ta e posibilidad nan cu AZV riba e parti aki. Loke cu sigur tin mester ta mas profesionalnan cu por dedica na e tipo di casonan di salud mental cu ta riba e lista di espera.
