Diaranson mainta, den salanan di Gloria Imax, a presenta e premiere di e pelicula “Otro banda di e cam”. Un pelicula produci pa e compania local Freeway Agency bou encargo di Coordinatiecentrum Mensenhandel Mensensmokkel Aruba (CMMA). Un pelicula cortico cu ta enfoca riba e fenomeno di traficacion y contrabanda di hende, algo cu hopi biaha nos no ta pensa cu ta pasa na Aruba, sinembargo ta un problema global, y sa pasa den e manera mas fini cu ta haci cu nos no ta consciente di dje, y awe nos ta pone atencion un biaha mas na esaki.
Durante e premiere di e pelicula aki, Minister President sra. Evelyn Wever-Croes conhuntamente cu Minister di Husticia y Asuntonan Social sr. Rocco Tjon a dirigi algun palabra tocante e fenomeno aki. Segun minister Tjon, na Aruba tambe nos ta duna e fenomeno aki cada aña mas atencion, y asina por a tuma nota di e progreso cu a wordo logra den e delaster añanan, cual a wordo constata tambe door di entre otro US department of State.
Na 2007 Gobierno di Aruba a dicidi cu e problema di traficacion y contrabanda di hende mester bira un di e topiconan pa pone mas atencion na dje. Den e añanan siguiente, hopi pasonan a wordo tuma cu hopi bon resultado, cual ta un resultado di e trabou continuo y e rol importante di e Coordinatiecentrum Mensenhandel Mensensmokkel Aruba (CMMA) den e area aki.
CMMA ta encarga cu tres tarea specifico pa loke ta traficacion y contrabanda di hende: Informa, Educa y Asisti. Asina, nos ta testigo di un otro resultado den e tarea di Educacion bou e capa di e pelicula ‘Otro banda di e cam’, cu ta parti di e campaña pa concientisa pueblo ‘Habri bo wowo’. Den e pelicula aki ta pone atencion riba un forma moderno di exploitacion y e mundo di sexcams. Aunke no tin informacion ainda cu e esaki ta tuma luga na Aruba, indicacion ta cu esey por yega akinan tambe. Mundo ta cambiando lihe y exploitacion via plataformanan digital ta aumentando. Pa e motibo aki, e campaña mas recien di CMMA bou e titulo ‘No cay den trampa’ ta hopi na su luga. E ta pidi atencion di hobennan, mayornan, docentenan y pueblo en general pa e riesgo di online trafficking.
Banda di e tarea di Educacion, CMMA tambe a traha duro pa realisa e tarea di asistencia. Hunto cu International Organization on Migration (IOM) un Standard Operating Procedure (SOP) a wordo scirbi pa crea un sistema di asistencia profesional y consistente na victimanan di traficacion di hende. IOM tambe a coopera pa financia un consehero pa traha un plan di implementacion di e SOP.
E calidad di un pais por wordo midi na e nivel di atencion cu ta wordo duna na asistencia pa victimanan di crimen. Pa e motibo aki, actividadnan den e ramo di asistencia mester por wordo guia doir di esun cu a experiencia traficacion di hende. Nan informacion ta esencial pa determina riesgonan, pa identifica y proteha victimanan, pa sigura acceso na husticia y pa yuda nan durante e proceso pa investiga, persigui y condena e traficadornan.
Un danki y pabien na CMMA, Freeway y tur otro instancia y profesional cu a contribui pa cu e premiere di e pelicula “Otro banda di e cam”, cual ta un campaña fuerte y solido pa loke ta conscientisacion di traficacion y contrabanda di hende.
