Durante rueda di prensa minister di Husticia y Asuntonan Social Sr. Rocco Tjon, hunto cu alto comisario suplente di Cuerpo Policial Sra. Irma Gordon, a atende cu diferente punto di atencion den e cuadro hudicial. A aclarea diferente punto, manera e parti di e autonan cu tawata tin staciona na garashi di polis, como tambe e proyecto di “Iron Eagle”, cual ta un proyecto pa asina eleva siguridad den nos comunidad.
Pa e parti di “in bewaring en beslag genomen” voertuigen, ta conoci cu for di inicio a cuminsa cu diferente proyectonan pa haci tur e diferente wardanan di polis y tambe garashi di polis limpi, mirando cu tawata tin basta auto ubica akinan. E autonan aki a trece diferente retonan cune, pa e parti di e administracion pero tambe gastonan pa pais Aruba. Cada bes cu un piesa wordo horta of un auto wordo distrui, land Aruba tin di para responsabel pa esaki, pues ta ensera gastonan grandi, y pa e motibo aki lo haci un restructuracion.
Na Juni di e aña aki lo bin un destaho publico caminda tur compania cu ta desea di participa, lo por haci esaki pa asina bira e instancia principal pa encarga su mes cu e trabou aki. Esaki ta di balor agrega pa pais Aruba pa diferente motibo; e ta bay ensera menos capacidad di cuerpo policial pa asina nan por atende cu nan “core business”, e ta eleva e siguridad di e materialnan cu ta wordo confisca y ubica akinan pero tambe di e personal. Den cuadro di esaki Minister di Husticia a firma diabierna ultimo un decreto, caminda ta bay ekipa camara na tur e wardanan di polis, cu un sistema caminda personal den e wardanan mes por monitorea tur e imagennan aki.
Por ultimo, como Ministerio di Husticia, ta manda un mensahe hopi cla na henter nos comunidad, a consecuencia di e incidente sumamente lamentabel cu a tuma luga algun dia atras, caminda un agente policial a keda severamente herida. E acto di violencia aki contra nos agentenan policial pero tambe contra cualkier “hulpverlener” ta wordo condena por completo. Lo pone tur recurso disponibel, pa detene e personanan cu ta culpabel pa cu actonan di violencia contra nan. Banda di esaki, lo percura tambe, den cuadro di ley, pa banda di detencion, usa tur posibilidad cu ley ta brinda den e proceso cu ta sigui na Ministerio Publico. Hunto cu alto mando, for di siman pasa a anuncia un maneho nobo esta; Iron Eagle, caminda pa un tempo defini cuerpo policial lo bay ta extra visibel riba caya. Lo bay tin mucho mas control y lo haci uso di tur posibilidad cu ley ta brinda pa por ehecuta cierto controlnan extra ordinario. Banda di esaki lo bay aumenta control riba vehiculonan y establecimentonan, pues e ta importante pa tin tur papel na ordo, pasobra esaki lo bay wordo controla.
