Diaranson mainta a tuma luga un reunion entre representante di Ministerio di Husticia y Asuntonan Social Sra. Michella Steenvoorde – Laclé, conhuntamente cu representantenan local y internacional di “TUR COS TA POSIBEL”, esta Sra. Angelique Wout y Mel Coward, como tambe e coordinadora di Formacion Social (Social Vorming Traject SVT) esta Sra. Jessica Ras. Den dicho reunion SVT a sera conoci cu e boluntario di Inglatera Sr. Tom Holmes kende lo tey pa tres luna y lo ta asistiendo diferente organisacionnan den nos comunidad deportivo na Aruba, ademas di otro instancianan manera SVT.
E aña aki a yega na un acuerdo entre “TUR COS TA POSIBEL” y SVT, cual den luna di maart, lo bay ricibi dies boluntario internacional y cinco boluntario local. E boluntarionan aki lo participa den un programa di dos siman di trabounan boluntario riba terenonan Social y Deportivo. E boluntarionan internacional lo keda hospeda na un cas na Pos Chikito pa asina por wordo transporta mas lihe na nan actividadnan di dia. Durante e presentacion di “TUR COS TA POSIBEL” na Mariniers Kazerne, a splica e integrantenan di SVT nan actividadnan y e posibilidadnan di inscribi como boluntario local. Mesora tawata tin hopi entusiasmo pa tuma un di e cuater cuponan cu tin reserva pa integrantenan di SVT pa asina ta un di e boluntarionan local. Sra. Jessica Ras, coordinadora di SVT, lo bay tin e dificil tarea pa selecta cuater for di tur esnan cu kier aplica.
Si nos boluntarionan haci un bon papel, nan lo tin e posibildad pa bay dos siman Inglatera den luna di Augustus, caminda nan lo traha na un music festival na Leeds riba temanan di reciclahe y sostenibilidad. Tur e gastonan lo wordo cubri for di fondonan Europeo di e programa Erasmus+. Minister Rocco Tjon ta sumamente contento pa e oportunidad brinda na nos hobennan, y ta deseanan hopi exito.
