Minister Rocco Tjon: Ekipo di Tourism Oriented Police a ricibi cuater bais nobo pa eleva siguridad den centro di ciudad di Oranjestad

Diaranson mainta, Minister di Husticia y Asuntonan Social sr. Rocco Tjon, tawata presente na Tribike Aruba, caminda a haci e entrega oficial di e cuater baisnan electrico nobo, pa e ekipo di e Tourism Oriented Police (TOP) di Cuerpo Policial. E aspecto bunita di e proyecto aki ta, cu esaki a wordo ehecuta a base di e peticion di e Agentenan Policial mes. 

Manera ta conoci, algun luna atras nos a bishita tur e wardanan di Polis, caminda e Agentenan Policial mes por a trece padilanti nan preocupacionnan, necesidadnan y recursonan cu nan tin mester di dje pa por eherce nan trabou debidamente y asina brinda un miho servicio na nos comunidad. E baisnan ta un di e puntonan cu a wordo treci padilanti door di e propio Agentenan Policial, y manera semper a bin ta bisa, e presupuesto ta brinda suficiente espacio pa por adkiri materialnan cu Cuerpo Policial ta indica cu tin mester di dje. 

E baisnan aki ta bay wordo uza door di e ekipo di TOP, pa eleva siguridad den centro di ciudad na Oranjestad, di e forma aki nos por wak cu turismo ta keda subi, mas barco crusero ta yega Aruba, hopi bishitante den e area di e centro di ciudad, pa cual motibo e baisnan aki ta sumamente importante. 

Importante pa menciona cu e proyecto aki ta un extension di e proyecto di camara di siguridad, cual manera ta conoci a wordo aproba recientemente pa asina ekipa ful e centro di ciudad di Oranjestad cu camara pa eleva siguridad. Cu e adicion di e baisnan aki, e Agentenan Policial lo bay ta hopi mas mobil y mas presente den e centro di ciudad, garantisando asina e siguridad no solamente pa nos bishitantenan pero tambe pa comunidad y e comerciantenan den centro di Ciudad. Nos ta ta sumamente contento cu e entrega oficial di e baisnan a tuma luga cu henter ekipo di TOP. 

Comunicado Minister Rocco Tjon