Diahuebs mainta den un bon esfera a firma un acuerdo di colaboracion entre Gobierno di Aruba y e organisacion “Operation Underground Railroad”. E organisacion aki ta basa na Merca, y tin como meta pa combati e fenomeno di traficacion di hende como tambe abuso sexual den e sentido mas amplio di e palabra. “Operation Underground Railroad” ta opera na diferente parti di mundo entre otro, paisnan situa na Europa, Africa y Sur-America.
Durante un reunion entre Minister di Husticia y Asuntonan Social Sr. Rocco Tjon, Minister President Sra. Evelyn Wever-Croes y “Operation Underground Railroad” a logra intercambia ideanan y a tene combersacionnan interesante. E organisacion “Operation Underground Railroad” ta traha hunto cu e departamentonan di Husticia den cuadro di combatimento di traficacion di hende y abuso sexual. Actualmente, e organisacion ta opera y tin un colaboracion cu 48 estadonan di Merca y 28 pais mundialmente.
E ekipo cu ta opera “Operation Underground Railroad” ta profesionalnan cu tin experencia den e tereno di Husticia, Militar y Inteligencia. E obhetivo principal di “Operation Underground Railroad” ta pa establece un colaboracion extenso y a largo plaso cu gobiernonan pa asina yuda combati tur tipo di traficacion di hende y abuso sexual.
Por ultimo, e Mandatario a expresa di ta sumamente contento cu a base di e reunionan aki, a logra firma un acuerdo (MOU) cu e organisacion aki, caminda a concretisa e colaboracion. E acuerdo aki no solamente ta ensera intercambio di ideanan y strategia, pero tambe lo colabora den e parti di training riba e dos fenomenonan aki. Esaki ta un otro paso importante pa Gabinete Wever-CroesII den e lucha di combatimento di traficacion di hende y abuso sexual.
